Lulzim Basha ka mbërritur rreth orës 19:00 në çadrën e opozitës që qëndron në zemër të Tiranës që prej datës 18 shkurt.
Ai iu përgjigj shkurt gazetarëve teksa tha se ishte shumë entuziast për marrëveshjen e arritur.
Në fjalën e tij drejtuar të pranishmëve, Basha tha se plot 90 ditë më parë nisi rrugëtimi epik qytetar dhe patriotik.
“Ju nisët rrugëtimin për të mos pranuar më me kokën poshtë gjendjen e mjerë të vendit dhe për të treguar të vërtetën e Shqipërisë para kujtdo. Për t’i treguar botës mbarë të vërtetën e dhimbshme të Shqipërisë për drogën dhe korrupsionin. U bashkuat 90 ditë më parë në këtë shesh për t’i treguar botës së shpresa nuk ka vdekur” – tha Basha në nisjen e fjalës së tij.
Sipas kreut të PD, më 18 Shkurt shqiptarët u mblodhën në një vend të pashpresë me kurajon për të garantuar zgjedhje të lira dhe të ndershme.
“Ajo që ju ndezët në zemër të Tiranës është flaka e të nesërmes që po vjen. Me qëndresën tuaj epike kjo lëvizje shembi muret e kështjellës së mykur të republikës së vjetër” – tha Basha.
Kreu i opozitës foli edhe për fushatën elektorale duke u shprehur se kjo lëvizje në çadër nuk do të përfundojë, por do të marshojë në çdo cep të Shqipërisë.
“Sot përmes dialogut politik republika e vjetër ka pranuar rrugën institucionale të asgjësimit të saj për t’i hapur vend ëndrrës tuaj. Kurrë më parë Europa nuk ka njohur një bashkim të tillë. Beteja për zgjedhje të lira u kurorëza jo me rrëzimin e qeverisë, por me gjysmën e saj, me garanci që duhet të zbatohen nga fillimi deri në fund, por beteja jonë nuk përfundon këtu. Kjo është vetëm nxemja. Po Republika e re është realiteti që do të jetësohet përmes vullnetit tonë dhe votës së shqiptarëve për programin dhe ekipin e Republikës së re në 25 qershor.” – tha Basha referuar marrëveshjes.
/javanews/b.d
