Pas ftesës që kreu i kuvendit i bëri opozitës për rikthimin në tryezën e ekspertëve, ka reaguar lideri i PD Lulzim Basha, i cili është shprehur se opozita, nuk do të pranojë asgjë tjetër përveçse rekomandimeve të Komisionit të Venecias në lidhje me reformën në Drejtësi. Basha tha se maxhoranca, pas rrëzimit të draftit të parë, po kërkon sërish që të çojë përpara një draft që i largohet vjedhurazi rekomandimeve të Komisionit të Venecias.
“Kam bërë një ftesë publike për Ramën dhe Metën që të punojmë mbi rekomandimet e Venecias si udhërrëfyes. Ka patur vetëm retorikë dhe asnjë veprim në këtë drejtim. Përkundrazi, ka patur veprime që bien ndesh me rekomandimet e Venecias dhe zotimin publik të maxhorancës, siç ishte drafti parafabrikat i 29 dhjetorit, një përpjekje tinëzare e Edi Ramës. Më 4 janar tryeza ra dakort dhe tha që nuk ka draft tjetër, por sërish maxhoranca ka shpërndarë një draft ku nuk reflektohen rekomandimet e Venecias. Në këto kushte Rama duhet të përgjigjet; t’i japë “Po” ose “Jo” Venecias. Ai mund të jetë draft i PS, i Fatmir Xhafës, por nuk është një produkt konsensual”, deklaroi kreu i PD.
Basha la të nënkuptohet se është pro një tryeze politike, një kërkesë kjo në fakt e artikuluar edhe më parë nga PD, si forma që do të garantonte atë që opozita e quan, duke ju referuar Venecias, si tentativa për “të çimentuar drejtësinë” nën pushtetin e mazhorancës.
“S’ka rëndësi të bëjmë shumë tryeza, se ne nuk jemi pallonj, jemi politikanë, unë e kam marrë vendimin tim, të zbatojmë rekomandimet e Venecias, t’i zbatojmë, të udhëzojnë ekspertët e tyre, ashtu si unë kam udhëzuar ekspertët e PD-së”- tha Basha.
Por cila mund të jetë tryeza politike për reformën? Basha duke komentuar propozimin e Nishanit, për mundësinë e ndërmjetësimit nga ana e kreut të shtetit për thirrjen e një tavoline të përbashkët tha:
“Mirëpres cdo iniciativë të presidentit për të ndihmuar në transparencën e procesit për të parë qartë se kush ka vullnet, PD ka vullnet të celiktë për reformën, ashtu si edhe për moskapjen e drejtësisë. Kush do le të vijë, kush nuk e ha, mos t’i bëjë mirë”.
