Kryetari i Partisë Demokratike, Lulzim Basha ka mbajtur sot një takim me një grup mjekësh, në lidhje me situatën e Covid-19.
Mjekët e pranishëm në takim me kryedemkokratin Basha propozuan që spitalet rajonale të futen në lojë për të ulur fluksin e qytetarëve, të cilët vijnë drejt Tiranës. Sipas tyre, aktivizimi i spitaleve rajonale do të japë impakt në uljen e mbingarkesës në spitale Covid në Tiranë.
Shefi i Partisë Demokratike tha se testimet janë të domosdoshme për të gjurmuar dhe izoluar zinxhirin e infeksionit të Covid-19.
“Testimin e kemi ngritur me forcë që në ditën e parë, kemi kërkuar që testimet të jenë në nivelin minimal, që ka rekomanduar OBSH-së. Për njerëzit kjo është e qartë, ne kërkojmë testime jo vetëm për hir të testimeve, qe të gjurmohet kontakti, të izolohet kontakti të ndërpritet zinxhiri i infektimit”, tha ai.
Gjithashtu Basha zgjodhi t’i rikthehet edhe njëherë numri të viktimave nga Covid-19, të cilat sipas tij nuk po raportohen dhe po fshehen nga strukturat shtetërore. Por kreu i PD u shfaq kontradiktor. Teksa prej ditësht akuzon mjekët për fshjehje viktimash, sot u shpreh se ata nuk kanë përgjegjësi në këtë politikë.
“Kaq i rendë është ky problem që fillon me mungesën e testimit dhe pastaj përcillet tek kolapsi sepse nuk ka shtretër, dhe pastaj reflektohet në numrin e atyre që humbin jetën. Ata që humbin jetën, sipas denoncimeve të ardhura nga mjekët janë shumë më shumë se ata që raportohen zyrtarisht. Kësaj i thonë të fshihesh pas gishtit. Mjekët dhe infermierët nuk kanë asnjë përgjegjësi në këtë politikë. Nuk po bëhet asgjë për t’i mbrojtur ata” – tha Basha.
/a.r
