Të tjera detaje janë zbardhur nga mbledhja e kryesisë nga Partia Demokratike e mbledhur prej orë 18:20 të pasdites së sotme, ku Basha ka lajmëruar hapjen e partisë, duke ftuar në PD këdo që kundërshton regjimin e Edi Ramës.
“Është momenti që të mirëpresim këdo që kundërshton regjimin e Ramës, që është në opozitë me të dhe kërkon të kontribuojë. Koalicioni ynë duhet bërë më i gjerë me çdo faktor për ta bërë sa më të shpejtë rotacionin politik”, ka thënë Basha.
Më tej ai ka shtuar se, “Paralelisht ne jemi në përfundim të programit tonë ekonomik për ta nxjerrë vendin nga kriza. PD është kthyer në shprese për shumicën e qytetarëve. Me qindra të rinj janë afruar pranë PD, pedagogë, mjeke, juristë, profesionistë nga të gjitha fushat që duan të japin kondributin e tyre në ndryshimin e vendit. Sa më mirë të dëgjohet zëri i qytetarëve, aq më i fortë do të jetë reagimi ynë”.
Sipas tij, “Brenda janarit do të përfundojë hartimi i alternativës sonë, në mënyrë konkrete, me përllogaritje për çdo fushë, çdo sektor, për çdo grup shoqëror, për bizneset e vogla dhe të mëdha, për investimet e huaja, për rininë. Të gjithë duhet ta dinë sot si do të jetë situata e tyre në qeverinë tonë. Objektivi ynë është: garantimi i votës së qytetarëve në zgjedhje të lira dhe të ndershme, nisje e negociatave për anëtarsim, zhvillim ekonomik, punësim për shqiptarët”.
/a.r
