Kryetari i Partisë Demokratike, Lulzim Basha, ka reaguar pas fjlëve të kryeministrit Edi Rama se edhe në Gjermani ndodhin ngjarje të rënda, siç ishte rasti i sulmeve seksuale në natën e ndërrimit të viteve, por edhe gjatë karnevaleve të Këlnit.
“Thirrja në ndihmë e ngjarjeve të Gjermanisë për të justifikuar krimet e tmerrshme në Shqipëri është perversitet i skajshëm”, deklaron Basha.
“Krimi në vendin tonë është unik, i pakrahasueshëm, sepse kryeministri e ministri i brendshëm janë kërthizëlidhur me bandat, me Shullazët, me Habilajt, me Hakmarrjen për Drejtësi”.
Basha vuri në dukje se PD nuk fajëson policinë, burrat dhe gratë me integritet që gjenden në detyrë, dhe as nuk pretendon në një shoqëri idilike pa konflikte e tension.
“Ajo çfarë duam është të ndalet burimi kryesor i ekzekutimeve, gjobëvënies, grabitjeve dhe i pasigurisë, që është lidhja e krimit me qeverinë. Nuk ka fatkeqësi me të madhe për një vend se kur kryeministri dhe ministri i brendshëm bashkëqeverisin me banda kriminale”, thekson kreu i PD-së.
