Kryetari i Partisë Demokratike, Lulzim Basha, në takimin me gazetarët tha se kryeministri Edi Rama nuk mund ta mbulojë dot varfërinë e shqiptarëve.
Kryeministri deklaroi dje se “ndërhyrja që u bë në vitin 2013, për të shmangur kolapsin financiar në vend, mundësoi uljen e tij. Kemi garantuar që 97 për qind e shqiptarëve të kenë sot më pak taksa se në 2013. Bëmë reformën në sistemin fiskal, e domosdoshme për të vendosur ekonominë në ekuilibër”.
Basha tha se nuk është ai që e përgënjeshtron kryeministrin, por vetë shifrat.
“Nuk ka shqiptar ta besojë atë që tha kryeministri dje. Shifrat flasin më mirë se unë dhe opozita, njerëzit e ndjejnë vetë në lëkurën e tyre”, tha Basha.
“Njerëzit po përjetojnë krizën ekonomike, përmes varfërisë, papunësisë, mundësisë së humbjes së punës”.
Sipas Bashës, është e pamundur ta fshehësh gjendjen e vështorë të ekonomisë shqiptare, duke akuzuar qeverinë për vjedhjen e 2.2 miliardë eurove në dy vjet.
“Kësaj gjendjeje, Rama nuk mund t’i bëjë makiazh. Shqiptarët e dinë se ku është katandisur ekonomia e tyre. Dua t’ju tregoj se si vidhen 2.2 miliardë euro në dy vjet, cili është instrumenti për t’i marrë ekonomisë shqiptare gjakun e saj dhe se çfarë do të bëhej nëse këto pará nuk do të ishin zhdukur në xhepat e qeveritarëve”, tha Basha.
“2.2 miliardë euro u janë vjedhur shqiptarëve në 2014 dhe 2015. Pjesa e luanit është nga abuzimi në dogana dhe tatime. Gjatë kësaj kohe rritën akcizën për naftën me 240 lekë për litër, për alkoolin, për cigaren. Megjithë këto tarifa dhe taksa të rritura, prapë se prapë kanë mbledhur më pak se plani, më pak se parashikimi dhe më pak se qeveria e mëparshme me taksa më të ulëta. 400 milion USD më pak vetëm vitin e kaluar. Afera CEZ spikat me volumin e saj si komponenti i dytë i abuzimit. 500 milion euro i mungojnë sot ekonomisë shqiptare, i mungojnë zhvillimit dhe energjetikës”, tha Basha.
Sipas tij “Pjesa e tretë, apo pjesa e luanit, është pjesa e Edit në fakt, pak e Olsit dhe e ndonjë tjetri, është pjesa e prokurorimeve publike. Në këto dy vjet qeveria vendosi dy rekorde: 1/3 e prokurorimeve publike kryhen drejtpërdrejtë. Nuk ka garë, nuk kërkon çmimin më të ulët. Po ku e merr këtë mall dhe këtë shërbim shteti i Edi Ramës? Në këtë nivel prokurimesh kemi një volum shpenzimesh luksi, të pakrahasuara me qeveritë europiane. Sot zyrtarisht këta që erdhën për një shpërndarjen më të barabartë sot drejtojnë një vend ku 4% e popullsisë zotërojnë 58% të depozitave, ndërkohë që kur ishin në opozitë thoshin se 5% e popullsisë zotëronte 50% të depozitave”.
Basha tregoi se cilat janë kompanitë që ai akuzon se kanë marrë paratë e shqiptarëve:
Alto Impeks, 1.4 miliard lekë, e zotëron nipi i Sadri Abazit, Arbër Abazi.
Atelier 4, pronë e klientëve të Ramës, Shkreli- Eftimi 267 milion lekë.
Classic e Agron Papulit ka fituar 595 milion lekë tendera.
Eurocol e Carapulit, me vlerë 18 miliard lekë.
Eurogjici në pronësi të Safet Gjicit 7.8 miliard lekë.
Fastek e Ilir Beqjes fiton 752 milion lekë.
Ndreu Security e Pjerin Ndreut 916 milion lekë.
Market Distribution e Vilma Nushit 316 milion lekë.
Omega Farma ka marrë 830 milion lekë.
Në total 88 milion USD e shqiptarëve të marra nga këto 11 firma.
***
Por ndërkohë që kreu demokrat po zhvillonte bashkëbisedimin me gazetarët, kryeministri Rama ka reaguar në Facebook.
“Beme O Babe te te ngjaj! Shpif Baba e shpif Çuni, shpif e shpif e eja rrotull se po na vjen Reforma ne Drejtesi,sa me shume balte se kushedi.” – shkruan Rama duke iu përgjigjur në distancë Bashës.
