Basha: Ilir Meta të japë dorëheqjen, i dyshuar për marrje ryshfeti
Kryetari i Partisë Demokratike, Lulzim Basha ka dalë në një konferencë për shtyp për të denoncuar një akt korrupsioni të kryer sipas tij nga kryetari aktual i Kuvendit, Ilir Meta, njëkohësisht edhe kreu i LSI-së në bashkëqeverisje me PS-në.
Lulzim Basha ka akuzuar Metën se ka marrë ryshfet nga një person i arrestuar më parë për korrupsion, duke deklaruar edhe se firma e mikut të kreut të Kuvendit ka përfituar miliona euro.
Basha ka kërkuar nisjen e hetimeve për të zbuluar atë që, sipas tij, mund të rezultojë si skema më e madhe e korrupsionit në vend. “Ilir Meta ia ka dalë mbanë t’i shpëtojë drejtësisë herët e kaluara, por këtë herë, Partia Demokratike dhe opozita është e vendosur që të kërkojë dorëheqjen e kreut të Kuvendit, në mënyrë që t’u hapë rrugë hetimeve të paanshme”, tha Basha, i cili paralajmëroi gjithashtu se “nëse Rama-Meta do të tentojnë manipulimin, do të përballen me qytetarët”.
Redaksia Java News/ f.g
