Sali Berisha, Lideri Historik i PD, hodhi akuza të rënda në adresë të Lëvizjes Vetëvendosje ditë më parë, kurse pasardhësi i tij, Lulzim Basha, sot në Prishtinë nuk i ka kursyer lëvdatat për subjektin politik të Visar Ymerit.
“Partia e Vetëvendosjes është forca politike e vetme në Kosovë e cila thotë se, unë jam për bashkim kombëtar. E them me bindjen më të thellë se kjo formë pune që ndjek ajo është absolutisht në kundërshtim me idealin e bashkimit kombëtar”, kishte deklaruar Berisha në emisionin Zonë e Lirë në Tv Klan.
“Diskutuam për politikën në Kosovë, Shqipëri, për sfidat e përbashkëta të Shqipëri e të Kosovës, për çështjet kyçe të interesave të përbashkëta të shqiptarëve, dhe për qasjet më konstruktive të mundshme në drejtim të zgjidhjes së këtyre sfidave. Pa asnjë dilemë, Vetëvendosje përfaqëson një pasuri kombëtare”, ka thënë ndërkaq Lulzim Basha sot pas një takimi me Visar Ymerin.
