Në kulmin e debateve për tarifën në Rrugën e Kombit, kryeministri Rama ka pritur të enjten në darkë në kryeministri 20 biznesmenët kryesorë që operojnë në qarkun e Kukësit për të dëgjuar kërkesat e tyre dhe për të kërkuar nga ata hapjen e vendeve të reja të punës për ata që kanë aplikuar pranë zyrave shtetërore të punësimit.
Takimi është zhvilluar rreth orës 19:00 deri në 21:00, dhe më pas kryeministri është larguar për të shkuar në një emision televiziv. Në këtë darkë kryeministri është shoqëruar nga dy ministrat, Arben Ahmetaj dhe Damian Gjiknuri, dhe drejtori rajonal i shërbimit kombëtar të punësimit në Kukës, Ledian Halilaj. Gjithashtu, e pranishme ka qenë edhe zv/ministrja e Financave, Dajna Sorensen.
Biznesmenët i kanë kërkuar kryeministrit që të kenë një përfaqësi të tyre në grupin negociator me koncensionarin, dhe kryeministri mësohet të ketë thënë se do të jetë një proces transparent me pjesëmarrjen e të gjithëve. Do të ketë reduktim çmimi, por jo heqje takse, mëson Report TV të ketë thënë kryeministri.
“Takse zero nuk ka se nuk kemi luksin per vete koston e larte te mirëmbajtjes por do rishikohet ulje e ndjeshme çmimi, abone si dhe favorizim më i lartë te banoreve te rrezes 20 km ne zone!”,-mësohet të ketë thënë kryeministri. Rama i ka njohur biznesmenët me planin për të hapur brenda vitit aeroportin e Kukësit, duke ju thënë se është parashikuar që të terminojnë 400 mijë udhëtarë në vit.
Ministri Ahmetaj ka bërë me dije shifrat, ku sipas tij “Kostoja mesatare ditore ne qytet e 1 udhëtari rezulton 10€ çfarë përkthehet ne mijëra vende pune dhe miliona dollarë qarkullim ne ekonominë e Kukesit”, ndaj ka ftuar biznesmenët të investojnë në agro-turizëm. Kryeministri ka kërkuar nga biznesmenët që punonjësit e tyre t’i rekrutojnë përmes zyrave kombëtare të punësimit.
ma.me
