Pak minuta pas publikimit të vendimit të qeverisë për miratimin e Byrosë Kombëtare të Hetimit ka ardhur edhe reagimi i kryetarit të Partisë Demokratike Lulzim Basha. Me sa duket, ende i panjohur me dokumentin, Basha tha se është për tu përshëndetur nëse i është dhënë OK variantit sipas të cilit Byroja vihet nën varësinë e Prokurorisë. Dhe nëse sipas tij ajo është vënë nën drejtimin e policisë, është një përpjekje e radhës për t’i hedhur hi syve të partnerëve.
“Aleanca e pashembullt me krimin dhe koncesionet e kanë bërë Ramën subjektin numër 1 të dekriminalizimit dhe Reformës në Drejtësi. Shqiptarët po ndërgjegjësohen çdo ditë se dekriminalizimi fillon nga Edi Rama. Ai është pengesa e vetme për Reformën në Drejtësi, për Byronë e Hetimit dhe çdo nisme që do çonte para drejtësisë të korruptuarit. Që nga dita kur ra poshtë ideja e tyre për të futur nën sqetull strukturën e hetimit ata e hodhën poshtë. Sot mediat njoftuan për miratimin e Draftit të Byrosë nga qeveria.
Drejtimi i Byrosë nuk mund të jetë jashtë prokurorisë. Nëse Byroja nuk është nën varësinë e prokurorisë ky është truk për ti hedhur hi syve të institucioneve ndërkombëtare. Të njëjtën lojë ka bërë edhe me Reformën në Drejtësi”, tha Basha.
Më tej kreu i opozitës ka shprehur mbështetjen e idesë për ngritjen e një misioni të Bashkimit Evropian për monitorimin e procesit të reformës në drejtësi.
“Mbështesim pa asnjë rezervë, ngritjen e një misioni të BE për monitorimin e procesit të Reformës në Drejtësi”, tha Basha.
Referuar lligjit të dekriminalizimit, ai tha se Edi Rama po mban peng miratimin e akteve nënligjore. Sipas bashës, Rama synon të mbajë nën mbrojtje personat e inkriminuar.
“Evropa ka vënë gishtin te plaga e moszbatimit të ligjit nga qeveria. Ne nënvizuam shqetësimin tonë për zvarritjen e akteve plotësuese të dekrinalizimit dhe sfidën që i bën kryeministri përmes fuqizimit ekonomik dhe politik të inkriminuarve. Që nga dita e miratimit të ligjit ai ka treguar se do ta linte në sirtar po të mundte. Ai po bën gjithçka që ti fusë nga dritarja personat me rekorde kriminale që ligji i largon. Ai kërkon t’i mbajë kryesisht brenda PS falangat e tij të krimit, me të njëjtat detyra, të vjedhin, plackisin, grabisin votat”, vijoi kreu i opozitës.
