Kryetari i Partisë Demokratike Lulzim Basha deklaroi se opozita nuk do lejojë mbajtjen e zgjedhjeve fasadë siç tha ai nga qeveria aktuale. Basha deklaroi se opozita do bëjë gjithçka për të bllokuar zgjedhjet nëse procesi nuk realizohet nga një qeveri teknike.
“Do të bllokohen zgjedhjet përmes të gjitha rrugëve. Ne nuk do të lejojmë që qeveria të mbajë zgjedhje fasadë.
Ne do të bëjmë gjkithçka që në 18 Qershor të ketë zgjedhje të lira e të ndershme”, deklaroi basha gjatë një lidhjeje në studion e Top Story.
Ai u tregua i kujdesshëm se nuk bëhet fjalë për bojkot zgjedhjesh nga ana e opozitës. Basha tha se zgjedhjet e lira janë aspirata e çdo shqiptari.
“Nuk ka bojkot dhe nuk do të ketë bojkot, sepse nuk do të ketë zgjedhje fasadë në këtë vend. Do të ketë zgjedhje të lira. Votime sa për të kaluar radhën, zgjedhje me krimin në pushtet, zgjedhje si ato të Dibrës, Korçës, Shqipëria nuk do të ketë më. Kjo është beteja, është aspirata e çdo shqiptari, zgjedhje të lira nga krimi, zgjedhje të lira nga droga.
E vetmja mënyrë për të patur zgjedhje, janë zgjedhje të lira dhe të ndershme dhe kjo kërkon në radhë të parë një qeveri teknike. Shqipëria ka ardhur në një situatë të jashtëzakonshme, jo vetëm sepse qeveria është e kapur nga krimi”, deklaroi Basha.
Në lidhje me deklaratën e Bashës për ‘ata që thonë broçkulla’ në ditën e vizitës së Mogherinit, Basha tha se ai është keqkuptuar, duke shtuar se nuk e kishte fjalën për Mogherinin, por për kryeministrin Rama.
“Takimi me Mogherinin ishte i vlefshëm, pata rastin t’i tregoj pse kërkoi qeverinë teknike. Hapjen e negociatave nuk e vendos një person, por duhet të jenë të gjitha shtetet dakord. Të gjithë shqiptarët e dinë se BE ka vendosur kusht plotësimin e 5 kritereve. Ajo që Mogherini thotë është një shtytje dashamirësi për Reformën në drejtësi” u shpreh Basha.
