Kryetari i Partisë Demokratike, Lulzim Basha tha sot se në Dibër prezantoi vizionin për Reformën Zgjedhore dhe ndryshimet kushtetuese, që iu japin qytetarëve mundësinë të zgjedhin dhe të përfaqësohen sipas vullnetit të tyre.
Në një postim në rrjetet sociale, Basha tha se PD propozon 6 pika për t’i dhënë fund sistemit të deformuar që i përjashton shqiptarët nga vendimmarrja.
“Lista të hapura, votuesit të kenë mundësi të zgjedhin vetë deputetin, jo kryetari.
Vetting për politikanët pastrim i politikës nga të korruptuarit dhe personat me lidhje kriminale, barazia e votës, numri i votuesve për mandat deputeti të jetë i njëjtë në të gjithë vendin, vota e diasporës, shqiptarët që jetojnë jashtë vendit, të kenë mundësi të votojnë në zgjedhje nga aty ku jetojnë, president nga populli dhe fund imunitetit nga ndjekja penale”, tha Basha.
“Asnjë imunitet për parlamentarët dhe qeveritarët që hetohen nga SPAK”, shtoi ai.
“Këto janë propozime konkrete, për ta vendosur politikën në shërbim të njerëzve, për të ngjallur shpresën dhe besimin te instrumenti i vetëm që kemi për të ndërtuar të gjithë bashkë një të ardhme më të mirë”, përfundoi Basha.
/a.r
