Profesori gjirokastrit me origjinë greke Panajot Barka i është drejtuar me një Letër Publike Presidentit të vendit, Ilir Meta. Në këtë letër, ai ngre shqetësimin e ngritjes së faktorit ekstremist në të dy vendet. “Dhe nuk do të që nevoja t’ju drejtohesha Juve Zoti President, apo dhe homologut Tuaj grek, nëse do ta evidentoja problemin vetëm tek faktori ekstremist nga të dy anët”.
Por, shqetësimi më i madh i tij, referohet për trajtimin e Minoritetit. Në këtë mënyrë, ai ka bërë dhe një pasqyrë të këtij realiteti. “Kohët e fundit, është fakt se MEG është kthyer në objekt presioni të drejtpërdrejtë i antihelenizmit në rritje në Shqipëri, shfaqur si nacionalizëm, në funksion të idesë së kombit të paafirmuar plotësisht për shkak të interesave të huaja. Me ngarkesa me negative dhe në funksion të kësaj ideje është ofensiva në plan medjatik, bibliografik dhe politik për të riparë politikisht historinë e aferme midis dy vendeve dhe për të rivlerësuar historinë e largët midis dy popujve. Kërkesa për rivlerësim të historisë së largët, jo vetëm merr si të vërteta të paverifikueshme konkluzionet romantike të shek. XIX të kultivuesve të ndërgjegjes kombëtare shqiptare, të servirura me së shumti bujarisht nga dijetarë dhe ideologë grek të kohës si mjet bashkimi me shqiptarët kundër pushtimit otoman, por shndërrohen tanimë në teza përvetësuese të kulturës greke që nga lashtësia dhe përdoren si ushqim për nacionalizmin antihelen në Shqipëri”.
Pastaj apeli i tij ka shkuar duke evokuar pasqyrimet e realitetit, duke përfunduar se:
”Kur lexohet veçmas dhe nuk kihet parasysh perspektiva evropiane, përvoja e popujve të përparuar, kur nuk ka vullnet për të prodhuar vlera të reja, për bashkëjetesa dhe përparim, ajo ndërlikohet dhe komplikohet dhe të mban me kokë të kthyer pas, të mban peng të së kaluarës së panevojshme dhe penguese për të ardhmen”.
Në fund drejtimi logjik ka shkuar direkt tek Presidenti Meta: “Ndaj besoj se është në dorën e gjithsecilit që mendon dhe aspiron vërtet vlerat e Perëndimit, të kontribuojë për mosprecipitimin e situatës, por për shëndoshjen e saj”.
