Bardhi: Presidenti të shkarkojë rektorin e UBT, Peleshi: Sallaku i gatshëm të flasë edhe në grupin e PD

Me thirrjen e rektorit të UBT-së  Fatbardh Sallaku në mbledhjen e grupit parlamentar, pas arrestimeve që SPAK bëri në institucionin që ai drejton, Partia Socialiste sipas Gazment Bardhit ka intimiduar drejtësinë.

Kreu i grupit parlamentar demokrat teksa replikonte me homologun e tij në PS, Niko Peleshi, tha se prezenca e rektorit të UBT ishte antikushtetuese.

“Dua të dënoj me forcë aktin që ka ndodhur dje në Kuvend, që një rektor kërkoi strehim në grupin tuaj parlamentar, kjo vjen në një kohe kur nuk ka sqaruar senatin, por vjen rrëfehet në grupin tuaj”, tha Bardhi në Kuvend.

Bardhi me ironi shtoi se edhe Safet Bajri ka kërkuar të flasë në grupin parlamentar socialist pasi u arrestua, ndërsa Peleshi iu përgjigj duke thënë Fatbardh Sallaku ka kërkuar të flasë edhe në grupin parlamentar të PD-së, duke mos mbajtur anë.

“Më thonë që ka kërkuar edhe Safet Bajri që të dëgjohet në grupin tuaj”, tha Bardhi, ndërsa Peleshi ia ktheu: “Spekulim dhe abuzim me fjalën në parlament, sepse nëse keni ndjekur fjalën e rektorit, u tregua i gatshëm të vijë edhe te ju të japë shpjegime”.

“Ai nuk mbajti anë, as ne”, nënvizoi Peleshi.

Por Bardhi insistoi në qëndrimin e tij, duke kërkuar në vijim që presidenti i Republikës, Bajram Begaj të shkarkojë rektorin Fatbardh Sallaku për shkelje të kushtetutës.

Peleshi akuzave të kolegut demokrat iu përgjigj më tej, duke i kërkuar që sherret e Primareve të PD të mos i sjellë në sallën e Parlamentit.

“Është e padrejtë të dezinformohet publiku, se është foltore e shenjtë këtu. Nëse ju lidheni me primaret dhe tensionet e paqartësinë që keni atje ta sillni këtu kjo është sjellja juaj. Pse ia hapëm derën rektorit? Ai erdhi të sqarojë dhe të kërkojë mbështetje për të mos u ndotur imazhi por të mbështetet edhe për procesin ndërkombëtar. E kundërta është e vërtetë nga ajo që tha Bardhi këtu, mos e ndotni“, deklaroi Peleshi.