Kreu i grupit parlamentar të Partisë Demokratike, Gazment Bardhi, ka akuzuar kryeministrin Edi Rama se po mashtron qytetarët me propagandë për procesin e integrimit europian, ndërsa paralajmëroi se Mali i Zi mund të bëhet anëtari i 28-të i BE-së para Shqipërisë.
“Ka momente kur një foto thotë më shumë se 100 raporte të qeverisë. Është një postim i Komisionit Europian dy javë më parë. KE ka ngritur një pyetje: A është Mali i Zi anëtari i 28 i BE-së? Nuk e bënë këtë pyetje për Shqipërinë, siç thotë propaganda këtu që qenkemi të parët në proces,” tha Bardhi në Kuvend.
Ai kujtoi se Mali i Zi ka 14 vite që negocion, ndërsa Shqipëria sipas tij ka humbur shansin për shkak të bllokimeve politike.
“Kaq do të kishim edhe ne nëse për tre vite në radhë Rama në opozitë nuk do të bllokonte statusin kandidat, vetëm që PD të mos merrte meritën historike. Edhe tani po i ngop shqiptarët me lugën bosh të 2030, si sharlatan ofronte pasaportën e BE. Para pak muajsh e harroi premtimin dhe tha se disa vende në BE nuk na duan, firmosi me Vuçiçin tërheqjen nga integrimi i plotë,” u shpreh Bardhi.
Sipas tij, nuk është se ndonjë vend anëtar i BE-së po pengon Shqipërinë, por vetë kryeministri Rama. “Në realitet nuk është se ndonjë vend anëtar i BE na e ka me hile, me hile na e ka Rama. Rama zgjodhi Belinda Ballukun dhe BE shpreh sot mosbesimin,” deklaroi Bardhi.
Kreu i grupit parlamentar të PD theksoi se raporti i fundit i qeverisë për integrimin është “shumë larg realitetit” dhe nuk i jep përgjigje asnjë çështjeje konkrete.
“Shqiptarët po penalizohen çdo ditë nga propaganda e kryeministrit, ndërsa procesi mbahet hermetikisht sekret,” përfundoi Bardhi.
