Barcelona është një fitore larg titullit në La Liga, pasi mposhti 5-0 skuadrën e Espanyol në derbin e luajtur në “Camp Nou”. Ky rezultat i mban katalanasit të vetëm në krye të kampionatit me një pikë më shumë se Real Madrid, që fitoi 3-1 ndaj Valencia dhe tre më shumë se Atletico Madrid që u mposht 2-1 në fushën e Levante të vendit të fundit.
Barcelona priti vetëm tetë minuta derisa gjeti golin e parë me një goditje dënimi të ekzekutuar në mënyrë spektakolare nga Lionel Messi. Pjesa e parë u mbyll 1-0, ndërsa në fillimin e pjesës së dytë, Luis Suarez shënoi dy gola në harkun e dhjetë minutave, duke i garantuar suksesin e skuadrës “blaugrana”. Uruguajani ka shënuar 37 gola në 37 javë kampionat.
Fitorja e Barcelonës u bë me “pesë yje”, pas golave të shënuar nga Rafinha dhe Neymar. Barcelona ka 88 pikë me 109 gola të shënuar, ndërsa Real Madrid ka 87 pikë me 108 gola të shënuar, pas fitores 3-2 ndaj Valencia në “Bernabeu”. Cristiano Ronaldo shënoi dy gola në mesin e secilës prej pjesëve, ndërsa gjithashtu shënoi edhe Benzema.
“CR7” ngjitet në kuotën e 33 golave, ndërsa për Valencia, që në pesë minutat e fundit luajti me dhjetë futbollistë, shënuan Rodrigo dhe Gomes. Real mban ende gjallë shpresën për një ndalesë të Barcelonës në ndeshjen e fundit, ndërsa Atletico Madrid është matematikisht jashtë luftës, pasi u mposht 2-1 nga Levante, edhe pse shënoi e para, pas vetëm dy minutash lojë me anë të Fernando Torres. (telesport / a.r)
