Barcelona ka rënë dakord të paguajë një gjobë prej 5.5 milionë euro për shkak të “gabimit në planifikimin e taksave” me rastin e transferimit të Neymar nga Santosi më 2013.
Prokurorët spanjollë e kanë dërguar çështjen në gjyq me pretendimin se Neymar dhe babai i tij, që është edhe agjenti i futbollistit të Barcelonës, dhe klubi katalunas kanë fshehur vlerën e vërtetë të marrëveshjes së transferimit, raporton Goal.
Barcelona kishte deklaruar se ka paguar një shumë prej 57 milionë euro për transferimin e Neymarit, 17 prej të cilave kanë shkuar te Santosi, dhe pjesa tjetër te babai i Neymarit, transmeton Koha.net.
Një fond investimi brazilian, i cili ka në pronësi 40 për qind të kartonit të Neymarit ka thënë se nuk iu është paguar shumë korrekte, ndërsa hetuesit e kësaj çështje kanë deklaruar se çmimi i vërtetë që Barcelona kishte paguar shkon në 83 milionë euro.
Kampionët e Spanjës tani kanë gjetur një zgjidhje të situatës, që do të thotë se ata nuk kanë ndonjë paqartësi mbi planet e tyre ekonomike për të ardhmen, duke u pajtuar që të paguajnë një gjobë prej 5.5 milionë euro. (b.an)
