Të shtunën në mbrëmje është beteja e radhës, Barcelona pret Real Madrid në “El Classico” që bën të mbajë frymën e gjithë bota.
Sa herë luajnë të dyja, është e pashmangshme përmendja e historisë, përplasjet e mëdha në fushë, por edhe jashtë saj.
Skuadra e Barcelonës shihet si një simbol i qytetit por edhe i gjitha Katalonjës dhe luftës së saj për t’u shkëputur nga Mbretëria e Spanjës.
Reali, nga ana tjetër, ka si “njollë në biografi” përkrahjen nga Gjeneralisimo Francisco Franco, të cilit i atribuojnë shumë nga sukseset e madrilenëve.
Por, a ka qenë kështu? Ja disa mite që ekzistojnë për këto dy klube të mëdhenj dhe e vërteta rreth tyre.
***
MITI Forcat fashiste të Francos e vunë që në fillim në shënjestër Barcelonën, duke vrarë presidentin e saj, Josep Sunyol, në gusht 1936, gjatë javëve të para të luftës civile.
E VËRTETA Vrasja e Sunyolit nuk ka të bëjë aspak me postin e tij si president i Barcelonës. Ai ishte deputet i Esquerra Republicana (E majta Republikane Katalanase) dhe aksidentalisht doli në anën e gabuar të frontit, duke brohoritur “Viva la Republica” para trupave nacionaliste të Francos.
***
MITI Regjimi i Francos nuk e lejoi Barcelonën të fitonte asgjë.
E VËRTETA Barcelona fitoi katër Copa del Generalisimo (po, të Gjeneralismit Franco) dhe tre tituj në periudhën midis fundit të luftës civile deri më 1953, koha kur regjimi ka qenë në kulmin e egërsisë. Iu deshën dhjetë vjet për të fituar titullin pas vdekjes së tij, ndërkohë që Reali fitoi katër nga pesë kampionatet e parë pas vdekjes së Francos.
***
MITI Barcelona gjithmonë ankohet për arbitrat, ndërsa lojtarët e Realit nuk i sheh kurrë duke bërë këtë gjë. Kodi i sjelljes, i cili i jep çdo lojtari, thotë: “Protestat ndaj gjyqtarëve… prishin imazhin tonë si klub dhe zotërinj… Kjo është e papranueshme”.
E VËRTETA Kjo është arsyeja pse herën e parë që Reali u eliminua në Europë nga Barcelona, lojtarët e tij u përpoqën të sulmonin gjyqtarin Reg Leafe në banketin e pasndeshjes?
***
MITI Vetëm pushteti i regjimit të Francos mbi arbitrat i dha mundësi Realit të ndërtonte një dinasti e të bëhej klubi më i suksesshëm në historinë e futbollit spanjoll.
E VËRTETA Kjo ishte arsyeja që Reali ishte edhe më i suksesshëm në Evropë, ku Franco ishte i papranueshëm?
***
MITI Real Madrid është një klub xhentëlmenësh. Tifozët e tij duartrokitën Ronaldinhon në nëntor 2005, pasi i dha fitoren Barcelonës në “Bernabeu”. Tifozët idhnakë të Barcelonës nuk do ta bënin kurrë këtë gjë.
E VËRTETA Shkurt 1980, Laurie Cunningham, me driblimet a la Ronaldinho ndihmoi Realin të fitonte 2-0 në Camp Nou. Për vete fitoi ovacione të papara nga ana e tifozëve të Barcelonës.
***
MITI Me katër tituj radhazi dhe Champions League më 1992, Dream Team e Barcelonës është skuadra më e madhe të gjitha kohëve.
E VËRTETA Ndoshta skuadra më me fat e të gjitha kohëve. Barça fitoi tre nga katër titujt e saj në javën e fundit, falë gabimeve të kundërshtarëve dhe jo brilancës së saj: në dy sezone radhazi, Reali shkatërroi gjithçka në fushën e Tenerifes, në rastin e tretë një penallti e humbur në minutën e 89-të nga qendërmbrojtësi i Deportivos, Miroslav Djukic, i dhuroi Barcelonës titullin. Oh, edhe Champions League e fitoi në kohën shtesë. Me një goditje standard. Ashtu si dhe në raundin e parë, me një gol me kokë në minutën e fundit në Kaizerslautern, nga xhuxhi Bakero, përsëri pas një goditjeje standard.
***
MITI Real Madrid është një klub spanjoll, gjithmonë gati të ndihmojë kombëtaren. Ndryshe nga Barcelona.
E VËRTETA Barcelona ka nxjerrë lojtarë për kombëtaren më shumë se çdo klub tjetër. Përfshirë edhe Realin.
Përgatiti Dritan Ikonomi
