Banorët e Smokthinës në Vlorë bllokuan për 30 minuta rrugën e Lumit të Vlorës, duke krijuar radhë të gjata në të dyja drejtimet e lëvizjes.
Ata pretendojnë se asfaltimi i rrugës rreth 17 km të gjatë, që lidh fshatrat Velçë, Ramicë, Matogjin, Vërvas, Bashaj dhe Vërmik, është premtuar shumë herë, por nuk është realizuar.
Banorët kërkojnë nga kryetari i bashkisë Selenicë, deputeti, por edhe nga qeveria, investimin për asfaltimin e rrugës.
“Është bërë që në kohë të Italisë e s’është vënë më dorë. E ka bërë Italia këtë rrugë. Ne jemi njerëz që jetojmë. Nuk na vijnë fëmija për të na takuar vetëm prej rrugës.“
“Nuk do ta lëmë vetëm me këtë protestë sot, por do të presim zërin e qeveritarë lokalë dhe qendrorë. Prapë ne do të jemi të bashkuar për ta kërkuar akoma më me forcë këtë të drejtë.“
Ndërsa banorët protestuan duke bllokuar aksin, kanë qenë të pranishëm edhe punonjës të Policisë së Shtetit, por mësohet se protesta nuk ka penguar lëvizjen e automjeteve të Urgjencës.
Banorët lajmërojnë se do të kenë reagime të tjera nëse Bashkia nuk do ta parashikojë investimin për asfaltimin e rrugës.
Bashkia Selenicë ka parashikuar investimin për 5 km e parë të aksit, deri në hyrje të fshatit Velçë, por banorët kërkojnë që qeveria të mbështesë financiarisht asfaltimin e pjesës tjetër të rrugës.
