Për të tretën herë, qytetarë të Patosit janë mbledhur sot (29 gusht) në protestë kundër propozimit për shkrirjen e Bashkisë Patos dhe bashkimin e saj me Bashkinë Fier.
Protestuesit shprehen kundër ndryshimit të statusit të qytetit, duke kërkuar që Patosi të vijojë të funksionojë si njësi e veçantë administrative dhe kundërshtojnë propozimin e PS për Territorialen.
Sipas tyre, Patosi plotëson kriteret për të qenë bashki, ndërsa një nga argumentet kryesore lidhet me të ardhurat që gjenerohen nga industria e naftës, e cila prej dekadash është një nga aktivitetet kryesore ekonomike të zonës.
Qytetarët kundërshtojnë gjithashtu largimin e shërbimeve administrative nga Patosi. Ata thonë se bashkimi me Fierin do të krijonte vështirësi, veçanërisht për të moshuarit, të cilët do të duhet të udhëtojnë drejt Fierit edhe për marrjen e dokumenteve apo shërbimeve të ndryshme.
“Patosi ka historinë, ekonominë dhe të ardhurat e veta. Nuk është e drejtë që qytetarët të detyrohen të shkojnë në Fier për shërbime që sot i marrin këtu. Sidomos për të moshuarit kjo është një vështirësi e madhe”, u shpreh një qytetar për TCH.
Protestuesit paralajmërojnë se do të vijojnë kundërshtimin e tyre edhe në ditët në vijim, duke kërkuar që zëri i qytetarëve të Patosit të merret në konsideratë përpara çdo vendimmarrjeje për riorganizimin territorial.
