Banka e Shqipërisë vëren se, në tremujorin e dytë të vitit 2015, bankat tregtare në vend lehtësuan standartet e kredidhënies për bizneset dhe për individët.
Sipas një vrojtimi të BSH-së, për bizneset, standardet rezultuan të lehtësuara për ndërmarrjet e vogla dhe të mesme, me qëllim financimin e investimeve dhe të kapitalit qarkullues. Standardet e aplikuara për kreditë dhënë korporatave mbetën të pandryshuara nga një tremujor më parë. Për kreditë dhënë individëve, standardet u lehtësuan si për kreditë me qëllim blerjen e banesës, ashtu dhe për atë me qëllim financimin e konsumit.
Ecuria e standardeve të kredidhënies për bizneset dhe individët u ndikua pozitivisht nga gjendja e likuiditetit të bankave, mjaftueshmëria e kapitalit, konkurrenca në tregun bankar, si dhe nga vendimet e marra nga Banka e Shqipërisë.
