Banka e Shqipërisë pritet ta ulë sërish normën bazë të interesit, në një përpjekje të re për të nxitur ekonominë dhe luftuar rënien e çmimeve. Top Channel ka mësuar se, stafi ekzekutiv i bankës do t’i propozojë Këshillit Mbikëqyrës të miratojë një tjetër ulje me 0.25 pikë përqindjeje të normës, duke e zbritur atë në minimumin e ri historik prej 1.5 për qind.
Burime konfidenciale bëjnë të ditur se, vendimi për uljen e normës është debatuar gjatë mes menaxhimit ekzekutiv të bankës dhe anëtarëve të Këshillit Mbikëqyrës. Këta të fundit kanë pasur rezerva dhe nuk kanë qenë plotësisht të bindur, nëse norma duhej ulur më tej.
Por në fund, varianti triumfues pritet të jetë ai i lehtësimit të mëtejshëm të politikës monetare dhe gjasat janë që, në mbledhjen e së mërkurës, Këshilli të miratojë uljen e normës në 1.5 për qind.
Një faktor i rëndësishëm në bindjen e Këshillit ka qenë dhe rekomandimi i FMN-së. Si rrallëherë më parë, në deklaratën zyrtare pas misionit të fundit, FMN i ka kërkuar haptazi Bankës së Shqipërisë të ulë më tej normën bazë për të mbështetur ekonominë, lehtësuar konsolidimin fiskal dhe për të mos lejuar rënien e ekonomisë në deflacion.
Ulja e pritshme e së mërkurës është e 15-a me radhë, çfarë përbën një tjetër rekord historik. Përmes kësaj mase, Banka e Shqipërisë synon t’i japë impulse të reja ekonomisë, duke ulur kostot e kredive për të inkurajuar konsumin dhe investimet e reja. TCh
