Kryetari i Komunës së Rahovecit në Kosovë, Smajl Laitifi u ka premtuar çifteve të reja se do t’u dhurojë banesa falas. Në mbledhjen e Kuvendit Komunal, Laitifi tha po ashtu se nga 1 janari i këtij viti, çdo lindje ka nisur të mbështetet me 500 euro nga komuna e drejtuar prej tij.
“Ne po synojmë që lindjet normale mos të na ikin diku tjetër. Unë po besoj që 500 euro nuk është një lloj standard i ri, kemi filluar me 200 euro dhe këtë vit është 500. Po ashtu çdo çift i ri që martohet ka me pasur nga një banesë. Veç ende s’kanë filluar ndërtimet, se çifteve të reja që do të martohen në komunë të Rahovecit unë do të ju dhuroj banesa”, theksoi Latifi.
Premtimi i Latifit vjen në një kohë që shkalla e emigrimit të qytetarëve është rritur, dhe lindshmëria ka rënë ndjeshëm në vitet e fundit. Sipas Agjencisë së Statistikave të Kosovës, numri i lindjeve në vitin 2014 ishte 25929, ndërsa në vitin 2018 numri i tyre u ul në 22761, ndërsa në 10 vitet e fundit nga vendi janë larguar më shumë se 220 mijë qytetarë.
/a.r
