Grupet shqiptare të trafikut dhe shpërndarjes së drogës po përdorin strategji nga më të ndryshmet për të realizuar ‘biznesin’ e tyre dhe për të mbuluar sa më shumë gjurmët e krimit. Siç është taktika e marrjes së mjeteve me qira për shpërndarjen e drogës. Dy prej rasteve u goditën brenda natës në Itali, ku u arrestuan 2 shqiptarë të dyshuar si trafikantë të kokainës.
Fillimisht u kap një 25-vjeçar në Cortona, duke shpërndarë drogë me një makinë që e kishte marrë me qira nga një kompani private.
Ka qenë një kontroll i rastësishëm nga patrulla që çoi në zbulimin në pjesën e pasme të sediljes edhe 13 pako të mbështjella me kokainë, me peshë totale 7 gramë.
Por ajo që ka habitur karabinierët dhe hetuesit ka qenë fakti se tashmë trafikantët po përdorin si strategji edhe marrjen e makinave nga kompanitë që i lëshojnë me qira, për t’i përdorur me qëllime kriminale dhe mbuluar sadopak gjurmët apo ngatërruar investiguesit.
Dhe ky nuk ishte rasti i vetëm. Sepse disa orë më pas, pak kilometra më tej, oficerët duke marrë shkas nga rasti i parë, ushtruan kontrolle në një tjetër mjet të marrë me qira nga një shqiptar 20-vjeçar, informon media italiane.
Në përfundim u zbuluan e fshehur poshtë sediljes së përparme, në anën e drejtuesit të mjetit, një kuti cigaresh me 5 mbështjellës lëndë narkotike të llojit kokainë, në total 3 gramë. Si provë u sekuestruan edhe 400 euro cash. Shqiptari u arrestua dhe për qëllime hetimore të mëtejshme.
