Sekretari i Përgjithshëm i OKB-së, Ban Ki-moon i ka bërë thirrje Rusisë dhe SHBA-së që t’i bashkojnë përpjekjet për luftimin e terrorizmit. Në samitin vjetor për Azinë Lindore në Kuala Lumpur, Ki-moon ka thënë se terroristët dhe ideologjia ekstremiste duhet të mposhtet në emër të humanizmit “Në këtë mënyrë ne duhet të bashkohemi. Duhet të tregojmë solidaritet global duke gjetur armikun e përbashkët, ISIS-in dhe grupet tjera terroriste”, ka thënë ai.
Ai ka thënë se aktualisht Kombet e Bashkuara janë duke mbledhur informata dhe ide, e po ashtu edhe përvoja nga shtetet anëtare. Në fillim të vitit të ardhshëm, sipas tij,OKB-ja do ta prezantojë një plan të përgjithshëm për ta mundur dhunën dhe ekstremizmin.
Për luftë të përbashkët kundër terrorizmit gatishmëri ka shprehur edhe presidenti rus Vladimir Putin, i cili ka thënë se dëshiron bashkëpunim global për ta mposhtur terrorizmin, pasi terroristët islamikë vranë 19 persona, përfshi gjashtë rusë, gjatë sulmit në Mali në një hotel luksoz, transmeton KosovaPress.
