Sekretari i përgjithshëm i OKB-së, Ban Ki-Moon, ka shprehur brengosjen e vet për shkak të dhunës dhe retorikës nxitëse me të cilën opozita në Kosovë ka penguar punën e Kuvendit dhe ka ngritur tensionet në rruge, si dhe u ka bërë thirrje të gjithë atyre që janë përgjegjës që të përmbahen nga kontestimi i demokracisë dhe përdorimi i dhunës, shkruan “Koha Ditore”.
Një sjellje e tillë është e papranueshme dhe nuk ka vend në një shoqëri demokratike, ka thënë Ban Ki-moon në raportin e rregullt tremujor për punën e UNMIK-ut që do të shqyrtohet para Këshillit të Sigurimit të OKB-së, të hënën. Siç ka bërë të ditur Qeveria e Kosovës, në takimin e së hënës, Kosovën do ta përfaqësojë ambasadorja në Washington, Vlora Çitaku.
