EKSKLUZIVE/ Ish-Presidenti, Bamir Topi, në një prnonocim ekskluziv për JavaNews.al, ka bër një përmbledhje të punës dhe arritjeve të tij gjatë mandatit 5-vjeçar në krye të shtetit shqiptar. Ish-Presidenti Topi vlerëson se arritja më e qënësishme, ishte ruajta e pavarësisë së institucioneve të pavarura nga sulmet e ish-kryeministrit Berisha, sulme të cilat, sipas tij, “do të mbeten në memorien kolektive, si sjellje primitive të një njeriu që donte pushtet absolut”.
Sipas Topit, “tendenca e sëmurë e Berishës për të kontrolluar gjithçka, edhe pse dështoi dhe u ndëshkua me votë nga shqiptarët, krijoi trauma për shoqërinë mes të gjithave ajo e 21 Janarit”.
“Natyrisht sot mund të bëj një analizë të ftohtë dhe objektive. Mandati im presidencial korrespondoi jo vetëm me ngjarje të mëdha për Shqipërinë dhe shqiptarët, por edhe me tensione të larta midis partive politike, por edhe midis politikës dhe institucioneve të pavarura, ku më i rëndësishmi ështe dhe mbetet institucioni i Presidentit të Republikës. Besoj se arritja më e qënësishme, ishte ruajta e pavarësisë së institucioneve të pavarura, ndonëse sulmet nga pushteti i ish-kryeministrit do të mbeten në memorien kolektive, si sjellje primitive të një njeriu që donte pushtet absolut, të papranueshme për një vend demokratik. Tendenca e sëmurë për të kontrolluar gjithçka, sipas meje dështoi, duke bërë që të humbë pushtetin nga një ndëshkim popullor me votë, por gjithësesi arriti të krijojë trauma për institucionet dhe një traumë psikologjike për shoqërinë që kulmoi me ngjarjet tragjike të 21 Janarit.” theksoi Topi për JavaNews.al
