Ish-presidenti Bamir Topi ka deklaruar në emisionin ‘Trialog’ të Alba Alishanit në RTSH1 se Partia Demokratike është e sëmurë kronike prej shumë vitesh.
E pyetur nga moderatorja Alba Alishani se përse Partia Demokratike nuk e kapitalizon gjithçka që ndodh në Shqipëri, Topi tha se Partia Demokratike është e sëmurë kronike dhe sipas tij kjo sëmundje mund ta lërë me pasoja të forta pa shanse rikuperimi.
“Meqenëse folëm për sëmundje, këtu jemi në një terren të një sëmundje kronike. Pra, në rast se në një situatë tjetër kemi një sëmundje akute, e komplikuar, këtu është situata e një sëmundje kronike që vjen prej vitesh. Dhe patjetër që sëmundje kronike mund të të lërë me probleme shumë të forta pa shanse rikuperimi”, tha Topi.
Ai vuri në dukje se opozita ndodhet në një paaftësi dramatike dhe u ka bërë njerëzve një “dekapitim sistematik të njerëzve me vlera në Partinë Demokratike. Kjo nuk ka ardhur me një muaj, me një vit por qysh prej fillimit”.
Sipas Topit, këtu politika ka skualifikuar njerëzit e kualifikuar ndryshe nga sa ndodh në politikën botërore.
“Kur vjen puna te opozita si institucion unë tentoj të jem shumë i kujdesshëm sepse në një situatë kur mazhoranca ka kapur çdo lloj pushteti, atëherë çfarë mbeti për të thënë për opozitën. Mund t’i thuash vetëm kaq; një paaftësi dramatike që vjen nga opozita.
Është dekapitim sistematik i njerëzve me vlera në Partinë Demokratike. Kjo nuk ka ardhur me një muaj, me një vit por qysh prej fillimit. Kam parasysh njerëz pa fund dhe ajo mund të kishte qenë ushtria në kuptimin pozitiv, më cilësore për të bërë rotacionin në Shqipëri.
Sepse ne e konsiderojmë politikën gjithmonë gabimisht si sport fizik, sport shpejtësie, ndërkohë që politika botërore me kalimin e viteve i kualifikon njerëzit. Ne njerëzit e kualifikuar i kemi skualifikuar në mënyrë sistematike”, deklaroi Topi në “Trialog”.
