Punimet për riparimin e rrëshqitjeve të ndodhura në aksin kombëtar Radhimë – Orikum do të nisin menjëherë dhe pritet të përfundojnë brenda 30 ditëve.
Dëmtimi i segmentit sipas Autoritetit Rrugor Shqiptar në zonën e Jonufrës ka ndodhur për shkak të papërgjegjshmërisë së një biznesi në këtë zonë, i cili gjatë punimeve të parkingut ka dëmtuar shtresat e rrugës.
“Ka patur një parkim, zhvillim biznesi i cili ka bërë heqjen e grimcave të rrugës dhe ka bërë që të ketë rrëshqitje”.
Ministrja e Infrastrukturës dhe Energjisë e konsideroi një rast flagrant i cili ka shkaktuar dëme për buxhetin e Autoritetit Rrugor, por dhe të bizneseve përreth, ndërsa kërkoi hetim nga prokuroria për përgjegjësit.
“Është një situatë e paprecedentë, pasi bizneset funksionjnë prej kohësh, nuk ka patur ndërhyrje të tilla ndonjëherë, papërgjeshmëria që është treguar nga pronarët e bizneseve këtu, prokuroria duhet të marrë masat dhe të ndiqet nga ana ligjore”.
Së shpejti do të nisë edhe riparimi i rrëshqitjes në zonën e Borshit, e cila po ashtu pritet të dorëzohet e përfunduar pas 1 muaji, por ndryshe nga rasti i Radhimës, problemi në Borsh ishte i rrëshqitjeve natyrore.
“Rasti i Borshit është rrëshqitje natyrore, por brenda 30 ditësh mbyllen të dyja rrëshqitjet”.
Ndërhyrja në këtë aks do të niste në fillim të vitit nga Fondi Shqiptar i Zhvillimit i cili kërkoi zhvendosjen e parave nga kredia e Fondit Saudit që financoi projektin e Lumit të Vlorës për rehabilitimin e kësaj emergjence, por për shkak të përplasjes Ministri Financash – Presidencë fondet nuk arritën të bëhen aktive dhe riparimi u mor përsipër nga ARRSH.
/a.r
