Balliu i PD: Për 16 marsin do thërrasim dhe kosovarë, ‘zjarrit me zjarr’

Protesta që opozita shqiptare ka paraljamëruar të mbajë më gatë 16 mars para kryeministrisë, për rrëzimin e qeverisë Rama, pritet të mbledhë edhe qytetarë të Diasporës. Teksa mbështeti edhe në ditën e 127 të protestës, banorët e Astirit, deputeti Klevis Balliu tha se më 16 mars, opozita, tashmë jo parlamentare, “do t’i përgjigjet zjarrit me zjarr”. Nuk dihet nëse kjo deklaratë do të thotë, se siç ka ndodhur edhe në protestat e shkuara, edhe tubimi i 16 marsit do të ketë dhunë ndaj forcave policore dhe sulm ndaj institucionit të kryeministrisë.

Banorët e “Astirit” kanë vijuar me protestën edhe pasditen e sotme, ku kanë bërë thirrje kundër projektit të zgjerimit të “Unazës së Madhe”. Në mbështetje të tyre ka qenë ish-deputeti i PD-së, Klevis Balliu, i cili si ndër të tjera ka hedhur akuza të forta kundër qeverisë Rama. Balliu ka ftuar çdo qytetarë që t’i bashkohet protestës së thirrur nga opozita me datë 16 mars.

“Demokracinë nuk ta jep kush dhuratë por duhet të luftosh që ta kesh. Ne do të luftojmë me 16 Mars të fitojmë. Zonjë ministre hajde provoje dhe prek një gurë në këtë rrugë. Kemi 127 ditë këtu dhe nuk do guxoni të prekni qoftë edhe një shtyllë këtu. 3 lote, të treja korruptive. Hajdeni po jua mbajti.”, u shpreh Balliu duke ju drejtuar ministres së Insfrastrukturës dhe Energjetikës, Belinda Balluku.

“E gjithë bota të marri vesh se ky zotëri është me keq se Gadafi, i cili mendon si të mbushi xhepate vet. Ekonomia e vendit tonë është rrënuar pasi Rama ekonominë tonë e dha me koncesion te miqtë e tij kriminelë. Boll më! Kupa është mbushur. Ka ardhur koha ta zhdukim nga institucionet e shtetit. Zjarrit do ti përgjigjemi me zjarr. Ju ftoj që sot të ftojmë çdo person në protestë. Madje do të ftojmë edhe vellezërit tanë në Kosovë. 16 marsi është data e gjykimit për Edi Ramën”, ka deklaruar Balliu.