Kreu i grupit parlamentar të Partisë Socialiste, Taulant Balla i ftuar në “Tonight Ilva Tare” thotë se reforma në drejtësi ka humbur ritmin e vet, ndërsa shton se kriteret për Këshillin e Lartë të Prokurorisë janë normale, pavarësisht se nuk ka kandidatë për të qenë pjesë e këtij institucioni.
Sipas tij, brenda tre muajve do të zgjidhet Prokurori i Përgjithshëm.
Pjesë nga deklarata:
Balla: Reforma në drejtësi ka humbur momentin. Ka humbur ritmin. Ne në Shqipëri nuk kemi bërë një reformë si Rumania. Ne kemi bërë reformën më të thellë të sistemit të drejtësisë të vendeve që janë të ngjashme.
Tare: Të thellë dhe me nxitim. Janë ndryshuar gjëra thelbësore dhe këtë e thonë edhe ata që e bënë, edhe ndërkombëtarët dhe e kanë dëmtuar reformën madje.
Balla: Dakord! Unë nuk mendoj se thelbi i reformës është prekur. Në leximin tim dispozita kalimtare për Prokurorin e Përgjithshëm për mendimin tim është shumë e qartë. I vetmi shqetësim që kam sot është inkurajimi i kandidatëve nga shoqëria civile për Këshillin e Lartë të Prokurorisë.
Tare: Janë kritere të pamenduara mirë.
Balla: Janë kritere tërësisht të pranueshme. Në shoqërinë civile nuk ka ende persona që janë të gatshëm të privohen nga disa liri për t’u bërë pjesë. Në procedurën e re do të ketë kandidatura të spikatura dhe deri në ngritjen e KLP-së që zgjedh prokurorin e përgjithshëm, kjo çështje do zgjidhet.
E kam dëgjuar me vëmendje debatin për mandatin e prokurorit të përgjithshëm. Me reformën në drejtësi, nuk ka rëndësi kush është prokuror i përgjithshëm, e rëndësishme është që ato prokurorë të mos sillen siç sillen sot një pjesë e prokurorëve me dosjet e korrupsionit politik.
Tare: Do t’i mbarojë mandati kryeprokurorit më 3 dhjetor?
Balla: Ku e morët këtë datë? As unë dhe askush nuk e ka tagrin të interpretojë vendimet e Kuvendit. Këshilli i Lartë i Prokurorisë dhe ai Gjyqësor do të ngrihen shumë shpejt dhe nëse vonohen, do të zgjidhen brenda 3 muajsh dhe do të zgjedhin kryeprokurorin e ri./a.ç
