Deputeti i Partisë Socialiste Taulant Balla, komentoi dorëheqjen e Namik Dokles dhe Arta Dades nga gara për kryesinë e re të kësaj force si një lëvizje për t’i hapur rrugë të rinjve.
“Z.Dokle dhe znj.Dade i hapën rrugën e të rinjve, duke dhënë dorëheqjen nga kandidimi për anëtar të kryesisë. Në PS ka gjithmonë një shkëmbim brezash. Një kolege shumë e nderuar, prej ditës së themelimit të PS, si kolegia Dade, ishte një prej kolegeve të propozuara për të qenë anëtare e kryesisë. Gjej rastin ta falenderoj për mesazhin që i dha Asamblesë së PS”, u shpreh Balla.
Ai theksoi midis të tjerash se Sekretari i Përgjithshëm, Gramoz Ruçi është i pazëvendësueshëm në PS dhe se vet Balla nuk ka aspiruar për këtë post.
“Sa herë që bëhet fjalë për lista dhe pozicione mediat bëjnë atë që nuk është. Bie dakord me kryetarin e PS, me Asamblenë, nuk ka një kandidaturë tjetër që të zëvendësojë Gramoz Ruçi”, tha Balla.
Balla i cilësoi fyerje deklaratat e Ben Blushit për kandidatët për anëtar kryesie të PS.
Sipas tij, me të tilla qëndrime Blushi ngjan gjithnjë edhe më shumë me Saliun.
