Ministri i Brendshëm Taulant Balla, ka zhvilluar një takim me gjeneralin Stuart Skeates, Koordinator Special i Qeverisë së Mbretërisë së Bashkuar për Emigracionin e Paligjshëm, në kuadër të takimeve të Komitetit të Përbashkët Mbikëqyrës për luftën kundër emigracionit të paligjshëm dhe fenomeneve të tjera kriminale.
Në fjalën e tij ministri Balla është shprehur se gjatë këtij muaji të parë të viti, nuk ka pasur anije të vogla të nisura me emigrantë shqiptarë drejt Britanisë së Madhe.
Ndër të tjera, gjatë bisedimeve Balla ndau me gjeneralin Stuart Skeates edhe rezultatet e Task Forcës së Përbashkët, ku mësohet se ka patur një ulje prej 93% të rasteve të emigrantëve shqiptarë krahasuar me vitin e kaluar.
Ndërkohë, Gjenerali britanik e cilësoi Shqipërinë si një partner të besueshëm në luftën kundër emigracionit të paligjshëm, krimit të organizuar dhe trafikut të narkotikëve
“Shqipëria mbetet një partner i besueshëm në luftën e përbashkët kundër emigracionit të paligjshëm, krimit të organizuar dhe trafikut të narkotikëve”, nënvizoi Stuart Skeates.
Takimi u mbajt vetëm pak kohë pas vizitës zyrtare të ministrit Balla në Britaninë e Madhe, në nëntor 2023, gjatë së cilës u firmos Deklarata e Bashkëpunimit për Çështjet e Brendshme/Krimi i Organizuar dhe Krimet e Rënda mes Shqipërisë dhe Mbretërisë së Bashkuar.
Gjatë takimit Ministri theksoi se strukturat shqiptare kanë nevojë për mbështetje logjistike dhe pajisje nga pala britanike pasi nga përvoja rezulton se një mbështetje e tillë sjell rezultate maksimale.
Ministri Balla nënvizoi gjithashtu nevojën për të pasur vendimet e gjykatave britanike për shtetasit shqiptarë të dënuar atje dhe të kthyer në Shqipëri. Në këtë takim u theksua gjithashtu se promovimi i migracionit të ligjshëm nëpërmjet lehtësimit të procedurave për bashkim familjar apo punësim sezonal mbeten mënyra më efikase për të luftuar emigracionin e paligjshëm.
Në tetorin e vitit të kaluar, Balla priti në Shqipëri James Cleverly, Sekretari i Shtetit të Mbretërisë së Bashkuar, me të cilin zhvilloi një vizitë në Rinas, për të parë nga afër instalimin e pajisjeve të dhuruara nga pala britanike në funksion të kontrollit të kufijve.
/f.s
