Ministri i Brendshëm Taulant Balla gjatë fjalës së tij në Kongresin e PS, ka deklaruar se do të ndjekë personalisht proceset gjyqësore të personave të arrestuar për zjarrvënie të qëllimshme në vend. Ndërsa duke folur për sigurinë në vend, Balla tha se numri i vrasjeve kriminale në vend ka rënë në mënyrë drastike krahasuar me një vit më parë. Më tej shtoi se në bashkëpunim me SPAK po zbardhen ngjarje kriminale të ndodhura dhe se goditjet ndaj grupeve kriminale do të rriten.
“Do të ndjek proceset gjyqsësore në ngarkim në 101 të arrestuarve për zjarrvënie të qëllimshme. Kërkojë dnime ekzemplare për kdëo që është i përfshirë në krime barbare. Në territorin e vendit nuk do ketë më feude që janë të fortë mbi qytetarët . Lufta kundër krimit të organizuar dhe përmirësimi i sigurisë publike mbeten prioritete kryesore. Goditjet ndaj grupeve kriminale do të vazhdojnë të intensifikohen. Në bashkëpunim me SPAK po çmontohen ngjarje të rënda ku janë përfshirë grupe kriminale. Ka një rënie drastike të numrit të vrasjeve kriminale gjatë këtij viti. Ndërsa viti më i mirë i atyre që sot bëjnë rrëmujë në Kuvendin e Shqipërisë ishte 124 vrasje kriminale. Indeksi europian mbi sigurinë publike e përcakton Shqipërinë shumë më mirë se vendet e BE-së. Deri në këtë moment që flasim, operacioni Tempulli ka goditur mbi 20 grupe kriminale dhe ka vënë në pranga mbi 400 persona”- tha Balla.
Ndërsa tha se do të ketë një praktikë të re penale për personat që ushtrojnë dhunë ndaj policëve apo kundërshtojnë urdhrin e tyre, Balla tha se do të ketë një bashkëpunim me drejtësinë për ta bërë të mundur një gjë të tillë.
Duke u përqendruar tek procesi i vetëpastrimit të policisë, Balla tha se në javët e fundit, deri më tani janë arrestuar 323 efektivë në kuadër të këtij procesi.
“Deri tani janë 323 punonjës policie të arrestuar apo të proceduar në kuadër të procesit vetëpastrimit të policisë. E ardhmja nuk do ketë krahasim me të sotmen”- tha Balla.
Fjala e plote e Balles
Ky Kongres i Partisë Socialiste erdhi në momentin e duhur, në aspektin e detyrave dhe bilanceve tona qeverisëse në të gjitha nivelet, por edhe të axhendës tonë politike që duhet të përmbyllet me fitoren e zgjedhjeve të radhës parlamentare.
Lajmi më i bukur i këtij viti nuk është vetëm shifra 10 milionë (që presim të mbyllim deri më 31 Dhjetor), por çertifikimi ndërkombëtar i Shqipërisë sonë si një destinacion europian me bukuri natyrore, mikpritje të pakonkurueshme dhe siguri mbresëlënëse.
Sot mund ta themi me kokën lart dhe me krenari se Shqipërisë i është pastruar një herë e mirë imazhi i nxirë nga një e shkuar e rëndë shumëvjeçare.
Siguria publike, në këtë sezon turistik historik, ishte një test i rëndësishëm pasi çertifikoi vendin tonë si një destinacion të sigurtë turistik, me ZERO ngjarje kriminale, ndaj jetës së turistëve të huaj të cilët zgjodhën Shqipërinë për të pushuar.
Sezoni i ri turistik do të ketë Forcën Kombëtare të Sigurisë Publike si një forcë shtesë për garantimin e sigurisë në destinacionet kryesore turistike. Inspektoriati Kombëtar i Mbrjtjes së Territorit në bashkëpunim me Policinë e Shtetit dhe agjencitë e tjera do duhet të garantojnë plazhe të lira dhe bregdet të pastër, nga Velipoja deri në Ksamil.
Investimet në infrastrukturën rrugore, përdorimi i teknologjisë në kontrollet e policisë rrugore ka sjellë një përmirësim tepër të madh të indikatorëve të sigurisë në rrugët e Shqipërisë.
Në 10 vitet e fundit numri makinave në pronësi të qytetarëve shqiptarë është dyfishuar,
nga 445.956 mjete në në vitin 2013,
në 758.000 mjete në vitin 2022,
ndërsa numri i aksidenteve është përgjysmuar
nga 2075 në vitin 2013 në 1.165 në vitin 2022,
ndërsa 2023 do të vazhdojë trendi i uljes së numrit të aksidenteve.
Por nuk është vetëm kjo.
Në këtë analizë nuk përfshihet rritja me disa fish e numrit të mjeteve me targa të huaja që hyjnë në Shqipëri, krahasuar me 10 vite më parë.
Vera e zgjatur e këtij viti na ndihmoi shumë për turizmi, por na vendosi përballë një numri të frikshëm zjarresh. Kam ndjekur dhe do të vazhdoj të ndjek personalisht proceset gjyqësore në ngarkim të 101 shtetasve të arrestuar/proceduar penalisht për këtë fenomen barbar
Të dashur miq,
Prej ditës së parë si Ministër i Brendshëm kam kuptuar se suksesi në këtë detyrë publike është i pamundur pa krijimin e një fryme skuadre në përpjekjen për të përmbushur objektivat në këtë sektor sfidues.
Kam shtërnguar duart me një pjesë të madhe të efektivëve dhe do të vijoj të takohem e dëgjoj me vëmendje çdo anëtar të trupës së Policisë.
Rezultatet e arritura deri më tani janë vetëm fillimi i një revanshi të sundimit të ligjit ndaj krimit të organizuar.
Në territorin e kësaj republike s’mund të ketë më feude apo bajraqe, ku mbi ligjin dhe mbi qytetarët të jenë të fortët, të cilët edhe kur policia i shoqëronte tek dera e komisariatit, ata dilnin po atë ditë nga dritarja me vendime të blera tek tezgat e drejtësisë së vjetër.
Lufta kundër krimit të organizuar dhe përmirësimi i sigurisë publike mbeten prioritet kryesor dhe goditjet e forta kundër grupeve kriminale vijojnë të intensifikohen çdo ditë.
Hetime komplekse në bashkëpunim me SPAK apo prokuroritë e jursidiksionit të përgjithshëm në rrethe po çmontojnë grupe të përfshira në ngjarje të rënda, si vrasje, apo trafiqe e pastrime parash.
Falë vendimit të Gjykatës Europiane për të Drejtat e Njeriut, edhe hetimi i vrasjeve të 21 Janarit është një detyrë prioritare për policinë dhe prokurorinë.
Ka një rënie drastike të numrit të vrasjeve kriminale gjatë këtij viti,
32 deri më tani 2023 krahasuar me 42 në vitin 2022
dhe me 124 në vitin 2012.
Duke e bërë vitin 2023 si një vit historik për rendin dhe sigurinë.
Këtu nuk duhet lënë pa përmendur edhe rritja e zbulueshmërisë dhe forcës parandaluese.
Indeksi Europian mbi Kriminalitetin dhe Sigurinë Publike e përcakton tashmë Shqipërinë si një vend me indicator sigurie më të lartë sesa fqinjë tanët të cilët janë anëtarë të Bashkimit Europian.
Vetëm në 20 javët e fundit, Policia e Shtetit ka realizuar
13 Operacione Kombëtare dhe 490 operacione policore lokale, me 3549 persona të ndaluar.
Lufta kundër fenomenit shqetësues të përdorimit të lëndëve narkotike po garanton cdo ditë shkolla dhe komunitete më të sigurta.
Deri në këtë moment falë Operacionit Kombëtar “TEMPULLI” janë goditur 24 grupe kriminale
dhe janë vendosur para drejtësisë 495 shtetas,
prodhues, shpërndarës dhe trafikantë të lëndëve narkotike.
Operacioni Kombëtar “SUNDIMI I LIGJIT” po jep gjithashtu rezultate të kënaqshme duke cuar para drejtësisë 302 shtetas,
të shpallur në kërkim ndërkombëtar ose kombëtar, grupe kriminale të përfshira në organizim të paligjshëm të lojërave të fatit, për armëmbajtje pa leje, për mashtrim, kontrabandë dhe krime të tjera ekonomike.
Në vijim të pastrimit të alpeve dhe zonave të tjera në të gjithë territorin,
janë asgjësuar 180 371 bimë narkotike cannabis sativa,
me 148 shtetas të ndaluar dhe vendosur nën akuzë.
Janë parandaluar nga Policia e Shtetit 45 ngjarje kriminale
dhe kjo duhet të sfida e re e punës së përditshme të policisë.
I kam kërkuar drejtorive vendore të policisë dorë të hekurt kundër dhunës më bazë gjinore dhe mbrojtje e mbështetje për viktimat e dhunës.
Policia e Shtetit po fiton një besim më të madh jo vetëm nga publiku por dhe nga agjencitë e vendeve partnere.
Qytetarët janë jo vetem arsyeja pse ekziston Policia, po janë edhe partnerët tanë të pazëvendësueshëm në mbrojtjen e vendit dhe të çdo individi, nga çdo lloj paligjshmërie, që nga krimi i organizuar, tek krimi ordiner dhe deri tek krimi ndaj pronës publike e private.
Rëndësia e detyrës që mbart uniforma e Policisë së Shtetit, duhet ta bëjnë shoqërinë të reflektojë për ridimensionimin e qëndrimeve dhe mbështetjes për sigurinë publike, garantuesi themelor i së cilës është Policia e Shtetit.
Kush nuk është dakord me urdhërin apo vendimin e punonjësit të policisë të marrë avokatin, por në rrugën tonë “të të bërit shtet”, na duhet të vendosim një standard të ri në autoritetin e punonjësit të Policisë së Shtetit.
As Ligji, as publiku nuk mund të pranojnë më shtyrje, fyerje, kërcënime, kanosje, dhunë dhe rrezikim të jetës së punonjësve të Policisë së Shtetit dhe të Gardës së Republikës, duhet vendosur një standard të ri ndaj kujtdo që ngre dorë kundër Shtetit.
Një politikë/praktikë e re penale të zërë vend në këtë drejtim, duke kërkuar mbështetjen e sistemit të drejtësisë.
Kuadri ligjor është aty në Kodin Penal dhe do të përforcohen në Kodin e ri Penal, si dhe në ligjin për Policinë Shtetit.
Rritja e standartit të jetesës dhe përmirësimi i kushteve të shërbimit të çdo punonjësi policie si dhe të Gardës së Republikës, që nga kushtet financiare deri tek kushtet e strehimit kur shërbejnë jashtë vendbanimit apo krijojnë familje të reja.
Prandaj falë mbështëtjes së Kryeministrit, e bëmë fakt dhe kemi tashmë 92 punonjës policie të cilët janë shpallur përfitues dhe do të hynë më në fund banesën e tyre.
Shpresoj të kemi të paktën 300 banesa të tjera gjatë 2024 dhe 500 të tjera një vit më pas, të cilat do t’u jepen familjeve të reja të punonjësve të policisë së shtetit.
Buxheti 2024, që miratuam dje në Kuvend, do të na japë mundësinë të bëjmë një rritje të konsiderueshme të pagave në Policinë e Shtetit dhe gjatë vitit tjetër t’i japim një zgjidhje përfundimtare pagesës së munguar të ushqimit për çdo punonjës policie.
Rritja e performancës së Policisë së Shtetit lidhet në mënyrë të pandashme me procesin e vetëpastrimit,
e cila tashmë ka hyrë në një fazë të re,
për të çrrënjosur një herë e përgjithmonë nga trupa e shëndoshë e policisë së shtetit elementët e dëmshëm të inkriminuar apo shkelës së etikës,
të cilët njollosin punën e palodhur të mijëra e mijëra uniformave blu që shërbejnë me vendosmëri të palëkundur shtetit të së drejtës dhe në mbrojtje të qytetarëve të këtij vendi.
Hetimet në bashkëpunim me SPAK, prokuroritë e jurisdiksionit të përgjithshëm, SHISH dhe agjenci të tjera për punonjës të nivelit të parë drejtues apo zbatues, të dyshuar për shpërdorim detyre, korrupsion, vepra penale në fushën e narkotikëve, veprime arbitrare, lidhje/komunikime me krimin si dhe çdo veprim tjetër të paligjshëm vijojnë dhe rezultatet e këtij procesi janë domethënëse:
323 punonjës policie të arrestuar/proceduar deri më tani.
Këto operacione dhe këto rezultate janë vetëm fillimi i vendosmërisë tonë për të vijuar me vetë-pastrimin e radhëve të Policisë së Shtetit nga ata elementë të cilët e dëmtojnë atë.
Ky proces i cili sapo ka hyrë në një fazë të re do t’i japë Shqipërisë dhe shqiptarëve një Polici më të fortë dhe një nivel akoma më të lartë të sundimit të ligjit.
E sotmja nuk ka krahasim me të shkuarën dhe ditë pas dite rikthimi i besimit tek Policia e Shtetit po avancon në mënyrë të dukshme dhe të padiskutueshme.
Por e ardhmja nuk do të ketë krahasim me të sotmen dhe unë kam nderin e madh, besimin e Kryeministrit, të shumicës së Kuvendit dhe shpresoj të shumicës së shqiptarëve për të vazhduar ndërtimin e besimit të duhur tek Policia e Shtetit edhe më shpejt, duke përmirësuar çdo gjë, në çdo drejtim. Vetëm përpara./m.j
