Me ftesë të Bundestagut gjerman një delegacion i Kuvendit të Shqipërisë i kryesuar nga Kryetari i Grupit Parlamentar të Miqësisë Shqipëri- Gjermani, Taulant Balla, vizitoi kryeqytetin gjerman, Berlinin.
Në delegacion bënin pjesë gjithashtu deputetët Majlinda Bregu, Kejdi Mehmetaj, Paulin Sterkaj dhe Gerti Bogdani.
Në Bundestag delegacioni shqiptar u prit në takime të veçanta nga Zëvendës Presidenti zoti Johannes Singhamer, nga Kryetari i Komisionit Parlamentar për Çështjet e BE-së zoti Gunther Krichbaum së bashku me raporterët për Shqipërinë në këtë Komision, si dhe nga deputeti përgjegjës për Politikën e Jashtme në Grupin Parlamentar Social-Demokrat zoti Niels Annen.
Gjithashtu delegacioni shqiptar pozitë-opozitë pati një darkë punë me drejtuesit e Grupit Parlamentar për Europën Juglindore të kryesuar nga deputeti Peter Weiss. Ndërsa në Kancelarinë Federale delegacioni shqiptar u prit nga Drejtori për Politikën e Jashtme dhe të Sigurisë zoti Joachim Bertele.
Kreu i delegacionit, njëherësh kryetar i Grupit Parlamentar të Miqësisë Shqipëri-Gjermani Taulant Balla në një prononcim për mediat vlerësoi takimet me përfaqësuesit më të rëndësishëm për çështjet e politikës së jashtme të të tre grupimeve më të rëndësishme në Bundestag.
Balla theksoi se “reforma në drejtësi mori vëmendjen më të madhe të zyrtarëve gjermanë të cilët theksuan rëndësinë që kjo reformë ka së pari në zhvillimin e brendshëm të Shqipërisë por edhe në procesin e integrimit të saj në BE, si parakusht për rekomandimin e KE për hapjen e negociatave. Kemi diskutuar për reformën në drejtësi duke bashkënënvizuar me kolegët gjermanë, rëndësinë që ka kjo reformë për bizneset gjermane të cilat duan të investojnë në Shqipëri por duan që të kenë sigurinë juridike si një gjë të domosdoshme”.
Po ashtu Balla u shpreh se “Gjithashtu është e rëndësishme që të kuptohet se procesi i integrimit të Shqipërisë në BE duhet të vazhdojë me hapjen e negociatave. Fakti që Komisioni Europian ka vendosur si parakusht miratimin në Parlamentin e Shqipërisë të paketës së reformës në drejtësi dhe me këtë ka lidhur rekomandimin për hapjen e negociatave tregon se, pasi Komisioni i reformës në drejtësi të ketë përmbyllur gjithë materialin që do t’i paraqitet Kuvendit, duhet votuar para verës. Pra, para se në vjeshtë Komisioni Europian të bëjë rekomandimin për hapjen e negociatave. Gjithashtu një tjetër gjë e rëndësishme që u diskutua në gjithë këto takime ishte intensifikimi i marrëdhënieve ekonomike, janë të shumta bizneset gjermane që po e shikojnë Shqipërinë si një destinacion për të investuar jo vetëm në fushën e turizmit por edhe në fusha të tjera shumë të rëndësishme të zhvillimit ekonomik.”
“Kështu që unë shpresoj se këto vizita i shërbejnë pikërisht këtij intensifikimi që duhet transformuar në vepra konkrete sa i përket kompanive të rëndësishme gjermane që duhen afruar në Shqipëri.”, përfundoi Balla pas takimeve.
