Kryetari i Grupit Parlamentar Taulant Balla së bashku me Kryetarin e Bashkisë së Elbasanit inspektuan punimet për rikonstruksionin e rrugëve “Çaush Asllani” dhe “Ismail & Xhemali Debrova” në qytetin e Elbasanit.
Balla përgëzoi Bashkinë e Elbasanit për punën intensive gjatë kësaj vere duke theksuar ndryshimin e madh midis atyre që janë zgjedhur për të punuar dhe atyre që dinë vetëm të shpifin:
“Ky qytet meriton më shumë dhe ne jemi të angazhuar t’i qëndrojmë punës, sepse ne jemi të zgjedhur për të bërë punë. Ka ca të tjerë, që ju i dini kush janë, që janë të votuar vetëm për të bërë llafe dhe shpifjen e kanë pjesë të mentalitetit të punës së tyre…
Më vjen mirë që pas një bllokimi prej gati 4 muajsh, më në fund arritëm të bëjmë një nga rrugët kryesore të qytetit të Elbasanit, rrugë kryesore edhe për faktin e shpërnguljes së institucioneve të drejtësisë në këtë zonë.
Ne jemi duke plotësuar të gjitha premtimet që u kemi dhënë qytetarëve dhe do të vazhdojmë me investime intensive, jo vetëm në qytetin e Elbasanit, por në të gjithë Bashkinë e Elbasanit” – tha Balla ndër të tjera.
Në Elbasan aktualisht janë disa kantiere ndërtimi, të gjitha të zhvendosura në lagjet periferike të cilat po rivitalizohen tërësisht, ashtu si qendra e qytetit.
/b.d
