Kryetari i Grupit Parlamentar i Partisë Socialiste, Taulant Balla, në fjalën e tij në seancën e sotme plenare ka reaguar pas kritikave të deputetëve për shtyrjen e emergjencës.
Balla i tërhoqi vëmendjen deputetëve duke theksuar se janë marrë të gjitha masat për parandalimin e përhapjes së COVID-19, ndërsa u shpreh se ata që janë kundër shtyrjes së emergjencës të pyesin deputetin Alimadhi se çfarë do të thotë të prekesh nga koronavirusi.
“Duhet të jemi të gjithë bashkë, pasi jeta e njerëzve është në rrezik. Kuvendi po jep shembullin më të keq për masat, po të vazhdojë kështu duhet të ndërpritet. Asnjë masë nuk është respektuar. Ne sot duhet të ishim shembull, nuk është çështje mode dhe kombinimi maska, por është detyrim që duhet të përdoret nga të gjithë. Edhe vendet e huaja kanë rekomanduar vendosjen e maskës në publik.
Qeveria të konsultohet dhe të marrë vendimet në bazë të vendeve të huaja, duhet të vendoset maska. Meqë ca deputetë u shqetësua për zgjatjen e fatkeqësisë natyrore, sot kemi 29 raste të reja. Zoti Gjoni ju thatë që nuk është gjë e madhe që kemi 27 jetë të humbura, më ndjeni pro çdo jetë shqiptari është e rëndësishme. Pyeteni zotin Alimadhi se si është ta kalosh COVID-19 dhe më pas hajdeni të na shisni dëngla këtu. Kjo është situatë e vështirë. Sot ne jemi rrezik potencial për vetën, edhe pse sulmi i virusit nuk na futi dot në një situatë të pamenaxhueshme”, deklaroi deputeti Taulant Balla. /e.s/
