Drejtuesi politik i PS-së në qarkun e Elbasanit, Taulant Balla u takua me banorët e Njësisë Administrative Bradashesh për të diskutuar mbi problematikat, por edhe përparësitë që çdo zonë ka për investime.
Bashkëqeverisja me qytetarët nuk i ndan ata në të majtë e në të djathtë, pasi siç tha Balla, vota e 25 Qershorit është lexuar si një votë kuqezi. “Ne e kemi lexuar votën e 25 Qershorit si një votë kuqezi dhe po kuqezi do të qeverisim në këto 4 vite. Tashmë jo në aleancë me partitë e interesave të vogla, por në aleancë dhe bashkëqeverisje me njerëzit e thjeshtë dhe të zakonshëm të këtij vendi. Është hera e parë pas 25 vitesh, që pas përfundimit të zgjedhjeve deputeti bashkë me kryetarin e bashkisë dhe me autoritete të tjera rikthehen përsëri në takime me njerëzit, për të identifikuar prioritetet kryesore të cilat ne mendojmë se duhen adresuar”, tha Balla.
Banorët e fshatrave të njësisë administrative Bradashesh ishin pjesë aktive e këtij takimi, duke nënvizuar të gjitha problemet e tyre dhe duke veçuar ato më imediatet. Banorët vlerësuan procesin duke shpresuar në vazhdimësinë e tij.
Bashkëbisedimi me qytetarët do të vijojë në të gjitha Njësitë Administrative të qarkut të Elbasanit, ku të gjithë deputetët janë të angazhuar të dëgjojnë më vëmendje zërin e qytetarëve, për t’i bërë ata pjesë të rëndësishme të vendimmarrjes./b.d
