Kryetari i grupit të Partisë Socialiste, Taulant Balla pasditen e sotme është pyetur për dy orë në prkurorinë e kryeqytetit në kuadër të hetimeve për rastin ‘Xhisiela’ pas denoncimit të ish-oficerit të policisë së Fushë Krujës, Emiljano Nuhu. Taulant Balla është pyetur nga prokurorja e Tiranës Elsa Miha për rreth dy orë.
Emiljano Nuhu akuzoi vëllain e deputetit se i ka vënë pistoletën në kokë, vetë deputetin Rraja, kryebashkiakun Artur Bushi dhe Taulant Ballën se ishin në mesin e 10 personave që e kërcënuan në komisariatin e Fushë Krujës në datë 21 korrik.
Por Balla ka mohuar kategorikisht se ka qenë në komisariat, po ashtu edhe personat e tjerë që janë përmendur, ndërsa ka kallëzuar penalisht jo vetëm ish-oficerin Nuhu, por edhe Bashën, gazetarin Basir Çollaku dhe dy deputetët e PD, Paloka dhe Alibeaj.
Pas daljes nga prokuroria e Tiranës, Taulant Balla në një prononcim për Report Tv është shprehur se është pyetur për kallëzimet që ka depozituar në organin e akuzës për rastin ‘Xhisiela’.
“Bëra kallëzimet ndaj Lulzim Bashës, Palokës, Emiljano Nuhut, Basir Çollakut dhe Alibeajt dhe u pyeta për paditë që bëra”, tha Balla
Ish-oficeri i Krujës, Nuhu që kërkoi azil në Zvicër pretendon se në datë 21 korrik është kërcënuar më armë në kokë për të mbyllur dosjen e hapur për akuzën e përdhunimit në ngarkim të djalit të deputetit të Partisë Socialiste, Rahman Rraja.
Ai akuzon se në datë 21 korrik vëllai i deputetit i ka vënë pistoletën në kokë, vetë deputetin Rraja, kryebashkiakun Artur Bushi dhe Taulant Ballën se ishin në mesin e 10 personave që e kërcënuan.
Por Nuhu, kur bëri më 30 korrik kallëzimin në Komisariatin 6 të Tiranës, duke denoncuar se ishte kërcënuar pasi po hetonte çështjen e Xhisielës, nuk i referohet aspak episodit të 21 korrikut. Kufizohet vetëm të thotë se pasditen e 30 korrikut dy kushërinj të Rexhep Rrajës, Redian dhe Ramazan Rraja, e kanë kontaktuar nëpërmjet Ëhat’s up-it, duke kërkuar ta takonin në Tiranë.
Sipas policisë që heton mbi këtë çështje, këto kërcënime me armë në të vërtetë nuk kanë ekzistuar dhe Emiljano Nuhu ka vendosur t’i shpikë ato vetëm para se të arratisej, në mes të gushtit, për ta bërë më të besueshme dhe solide kërkesën për azil politik.
ma.me
