Kreu i grupit parlamentar të PS-së, Taulant Balla ka qenë i prerë teksa ka folur sërish sot për zgjedhjet vendore dhe 30 qershorin.
Në një deklaratë për mediat, Balla ka theksuar se aktualisht nis fushata zgjedhore.
“Zgjedhjet e 30 qershorit janë një moment i rëndësishëm për funksionimin e shtetit ligjor në vend, institucionet dhe demokracia funksionon mbi bazën e rregullave. Ju them qartë që më 30 qershor fiton Shqipëria dhe shqiptarët, shteti institucional, demokracia, kushtetuta dhe pas 30 qershorit është mundësi e artë edhe për PD dhe atë që ka mbetur nga LSI, që të reflektojnë në dy drejtime: kush politikan punon kundër reformës në drejtësi e ka betejën të humbur dhe kush politikan punon kundër interesave të vendit dhe integrimit, e ka të humbur këtë betejë”, tha ai.
Këto deklarata kreu i grupit socialist i ka bërë në përfundim të seancës ku ka kërkuar pafajësi lidhur me akuzat e Shkëlzen Berishës për shpifje. Balla është shprehur se dosja CEZ i ka shkaktuar miliona euro humbje shqiptarëve teksa theksoi se me Reformën e re në drejtësi asnjë politikan i korruptuar nuk do shpëtojë pa u dënuar.
“Kush mendon se unë apo PS se kemi hequr dorë nga koha kur kemi qenë në opozitë e ka shumë gabim se për ne seriozitetit për gjithë këto vite ka të bëjë me angazhimin tonë për të ccuar deri në fund Reformën në Drejtësi. Në Rumani kryetari i parlamentit u arrestua për një çështje të para 10 viteve. Asnjë ccështje korruptive nuk do ngelet pa hetuar. Lufta kundër korrupsionit dhe politikanëve të korruptuar është betejë që nuk mbaron kurrë. Prokuroria e re e reformës në drejtësi do i rimarrin të gjitha këto çështje. Dosja CEZ i ka kushtuar shqiptarëve miliona euro humbje, me të birin e Sali Berishës. Dua t’ju them se sot në asnjë rast politikanët që kanë qenë kundër reformës në drejtësi dhe përpiqen të dëmtojnë integrimin e vendit, ta keni të qartë se kjo është një rrugë pa kthim”, tha Balla.
Në seancën e sotme gjyqësore mungoi Shkëlzen Berisha, ndërsa përfaqësuesi i tij ligjor ka kërkuar dënimin e Ballës për shpifje.
g.kosovari
