Kryetari i Grupit Social-Demokrat në Asamblenë Parlamentare të Këshillit të Europës Frank Schwabe, ka folur nga Tirana lidhur me reformën në drejtësi të cilën e vlerëson si jetike për vendin.
I shoqëruar nga socialisti Taulant Balla, ai thotë se implementimi i reformës është një mesazh për vendet e BE-së për t’i hapur Shqipërisë dyert drejT Europës.
“Mendoj se ecuria e deritanishme e reformës në drejtësi është një sinjal i mirë, por ka ende hapa të tjerë për tu ndërmarrë për tu dhënë më shumë argumente vendeve të tjera të BE-së për të votuar pro hapjes së negociatave me Shqipërinë.
Kjo sepse është shumë e rëndësishme të vazhdohet me reformën në drejtësi dhe me luftën kundër korrupsionit dhe siç e thashë dhe më pare, është shumë e rëndësishme të flitet për kodin zgjedhor dhe të ndiqen rekomandimet e OSBE/ODIHR-it dhe të Komisionit të Venecias”, u shpreh Schwabe.
Deklarata e plotë
Shumë faleminderit për këtë takim që zhvilluam këtu në Tiranë. Kjo është një vizitë që realizohet në një kohë shumë të rëndësishme.
E di që sot është një ditë e rëndësishme për Shqipërinë për arsye se edhe Komisioneri i BE-së, z. Hahn ndodhet sot për vizitë në Tiranë dhe mendoj që ky është një sinjal shumë i mirë për procesin. Këshilli i Evropës dhe Bashkimi Evropian kanë të njëjtat synime, sa i takon Evropës dhe Shqipërisë, dhe ato janë përmirësimi i demokracisë, situatës së të drejtave të njeriut dhe të sundimit të ligjit. Sot kam folur për këto tema në takimet shumë të rëndësishme që kam pasur me Kryeministrin, me Presidentin e Republikës dhe me Kryetarin e Kuvendit.
Kolegët tanë nga Shqipëria janë një pjesë shumë e rëndësishme e grupit në Asamblenë Parlamentare të Këshillit të Europës dhe së bashku përpiqemi të përmirësojmë situatën në fushën e së drejtës të Këshillit të Evropës në të 47 vendet anëtare dhe sigurisht, në çdo vend në veçanti, ashtu si dhe në Shqipëri. Sa i takon muajve në vijim, do i kërkoja Shqipërisë të ecë përpara në rrugën e nisur. Mendoj se ecuria e deritanishme e reformës në drejtësi është një sinjal i mirë, por ka ende hapa të tjerë për tu ndërmarrë për tu dhënë më shumë argumente vendeve të tjera të BE-së për të votuar pro hapjes së negociatave me Shqipërinë. Kjo sepse është shumë e rëndësishme të vazhdohet me reformën në drejtësi dhe me luftën kundër korrupsionit dhe siç e thashë dhe më pare, është shumë e rëndësishme të flitet për kodin zgjedhor dhe të ndiqen rekomandimet e OSBE/ODIHR-it dhe të Komisionit të Venecias. Kjo ishte një vizitë 24-orëshe dhe sigurisht nuk do të jetë vizita ime e fundit në Shqipëri. Mendoj se kjo është një kohë shumë interesante dhe e rëndësishme për Shqipërinë dhe për marrëdhëniet tona në 12 muajt e ardhshëm.
Nga ana tjetër, Balla tha:
“Këtu në Partinë Socialiste, kisha nderin të prisnim një mik të vyer të Shqipërisë, i cili drejton prej pak kohësh Grupin e Socialistëve Demokratëve dhe të Gjelbërve në Asamblenë Parlamentare të Këshillit të Europës. Gjithashtu është dhe një deputet mjaft i rëndësishëm në Bundestagun gjerman, si pjesë e Social Demokratëve.
Gjej rastin që dhe një herë të rifalenderoj Bundestagun dhe qeverinë gjermane për mbështetjen e vazhdueshme dhe të sinqertë që i jep procesit të integrimit europian të Shqipërisë, e në mënyrë të veçantë antarët e koalicionit qeverisës në gjermani, Social Demokratët, të cilët kanë luajtur në rol shumë të rëndësishëm në vendimarrjen e Këshillit Europian, përsa i përket përcaktimit të datës për hapjen e negociatave të antarësimit të Shqipërisë në BE dhe sigurisht për një proces parapërgatitor me qellim që procesi i negociatave të vijojë ashtu siç duhet.
Përsa i përket pjesë tjetër, atë të Asamblesë Parlamentare të Këshillit të Europës, dua të theksoj se Shqipëria është një antar i cili luan një rol të rëndësishëm në Asamblenë Parlamentare, deputetët tanë, qofshin ata përfaqësues të PS-së, por dhe të opozitës luajnë një rol të rëndësishëm në drejtim të grupeve parlamentare ku ata bëjnë pjesë.Kemi diskutuar së bashku për çështjet e rëndësishme në interes të Asamblesë Parlamentare të Këshillit të Europës, sikurse është dhe ajo që u theksua dhe në raportin e Këshillit Europian e që ka të bëjë me implementimin e menjëhershëm dhe pa humbur kohë të rekomandimeve të raportit të OSBE/ODHIR-it për zgjedhjet në Shqipëri, të cilat janë kuadri dhe shinat mbi të cilat ne duhet të përmbyllim brenda fillim vjeshtës së këtij viti miratimin në Kuvend të këtyre rekomadimeve në kuadër të Reformës Zgjedhore.
Miku ynë Schwabe kishte interes edhe përsa i përket çështjeve që lidhen me respektimin e të drejtave të njeriut, me vijimin e implementimit të reformës në drejtësi, ku bashkëndamë faktin që reforma në drejtësi po ecën me ritme të shkëlqyera, procesi Vettingut po ecën me ritme shumë të mira dhe sigurisht në një kohë të shkurtër institucionet e reja të drejtësisë do të jenë funksionale”, tha Balla
a.ç
