Numri dy i PS, Taulant Balla, ka komentuar dosjen e CEZ dhe krijimin e SPAK në emisionin “Java në RTSH”.
I pyetur nga analistët Preç Zogaj dhe Lorenc Vangjeli për kalimin e Dosjes së CEZ në Prokurorinë Speciale antikorrupsion (SPAK), Balla tha se ky transferim i kësaj dosjes vjen natyrshëm për shkak dhe të natyrës së hetimit.
“Shpesh në rrugë më takojnë njerëz dhe më thonë, Taulant çfarë po bëhet me akuzat që ke bërë kur ke qenë në opozitë, apo akuzat e tjera për keq qeverisjen e Berishës në tetë vite. Kushdo që mendon se ne, unë apo kolegë të mi, i kemi harruar ato akuza, e ka krejtësisht gabim. E tillë është dhe një prej dosjeve më domethënëse për thellësinë dhe të përfshirjes së shumë politikanëve në korrupsion.
E tillë është dosja e CEZ e cila ka fillesën e saj që në fund të vitit 2005, kur qeveria e sapo ardhur në pushtet e Sali Berishës nisi procedurën që u mbyll në vitin 2009 dhe që nga komisioni ynë hetimor u konkludua se dëmi që ju krijua shtetit nga ky proces ishte 418 milionë dollarë. Kjo për privatizimin dhe shkeljet e tjera më pas, pasi jo vetëm që u gabua për privatizimin, por dhe shkeljet të mëtejshme, pasi Sali Berisha jo vetëm ka gabuar me privatizimin, por ka favorizuar kompaninë çeke në dëm të interesave të vendit.
Komisioni hetimor i ngritur për çështjen CEZ, mund të jetë i vetmi, që ka kryer të gjitha procedurat nga A te ZH dhe me votën e 74 anëtarëve të Kuvendit dhe të Ilir Metës, kanë votuar që kjo dosje dhe raporti t’i shkoj prokurorisë sipas dispozitave të kodit penal, pra te Prokurori i Përgjithshëm, tani sipas dispozitave të reja, kjo dosje shkon drejt për drejt në SPAK”-, theksoi Balla.
“Më datë 18 dhjetor Prokuroria e Tiranës ka vendosur pushimin e çështjes për mbylljen e hetimeve në ngarkim të personave të kallëzuar. Edhe përpara disa kohësh ka pasur disa përpjekje për të mbyllur dosje.
Gjykata la disa detyra, që nuk u realizuan nga ana e prokurorit. Ajo që është më qesharakë është fakti se prokurori deklaron se edhe pse ka kërkuar, nuk ka pasur mundësi të marri në pyetje një prej personave të kallëzuar prej nesh dhe që mban statusin e dëshmitarit kyç, pasi është personi që 12 ditë para zgjedhjeve të 28 qershorit 2009 ka shkuar në një bankë të nivelit të dytë në Shqipëri. Ky person njihej si sekseri i shitjes së OSSH-së, duke tërhequr 6.8 milionë euro, duke i justifikuar si fitim i tij për sekserllëkun për shitjen e kompanisë.
Ky person duhet marrë në pyetje se me çfarë kontrate e ka marrë këtë përfitim. Nga e-maili rezulton se ky kishte komunikim dhe ish zyrtarë të nivelit të lartë dhe madje dhe familjarë të ish Kryeministrit”-, theksoi Balla.
“Nuk ka padi të re, shtoi ai. Në mënyrë juridiksionale, të gjitha çështjet për akuza që përfshihen ndaj zyrtarëve të lartë, sikurse është ndikimi ushtrimit të paligjshëm, apo korrupsioni i kalojnë SPAK. Unë thjesht i kam rënë bilbilit, që kjo nuk është më çështje që gjykohet nga gjykata e Tiranës, por hetohet nga Struktura e Posaçme antikorrupsion dhe Gjykata Speciale antikorrupsion”-, tha Balla.
