Pas operacionit të sotëm anti-drogë në Tiranë e disa qytete të tjera, kanë dalë në deklaratë për mediat Ministri i Brendshëm Taulant Balla dhe kreu i Policisë së Shtetit Muhamet Rrumbullaku.
Balla përgëzoi efektivët dhe Forcat e Armatosura për angazhimin e tyre në finalizimin me sukses të këtij operacioni, që siç theksoi ai nuk është i pari.
“Dua të përgëzoj dhe të shpreh mirënjohjen time për të gjitha forcave të Policisë së Shtetit të përfshira në operacionin e konkluduar sot dhe Shtabin e Forcave të Armatosura për organizimin me sukses të plotë të këtij mega operacioni që ishte kapilar në të gjithë vendin për goditjen e rrjeteve kriminale të prodhimit dhe shpërndarjes së lëndëve narkotike. Ky operacion shënon vetëm fillimin e një rrugëtimi të ri në luftën kundër trafikimit të çdo lloj lënde narkotike.”
Balla thotë se gjatë kontrolleve në vend janë zbuluar llojë të lëndëve narkotike që nuk dihej se ekzistonin brenda territorit të Shqipërisë.
“Policia e Shtetit ka përvojën, kapacitete profesionale për ta luftuar me efikasitet të plotë kriminalitetitn. Të gjithë biem dakord se përdorimi i substancave narkotike ka marrë përmasa të panjohura më parë, të dhënat na tregojnë një numër në rritje të rasteve të përdorimit. Ajo që mbetet më problematike është se po ulet mosha e atyre që përdorin për herë të parë lëndë narkotike, veçanërisht në gjimnaze. Është shtuar dhe përdorimi i drogërave sintetike. Janë zbuluar drogëra gjatë kontrolleve që ne nuk e dinim se ekzistonin në Shqipëri. Kur shpalla më 1 Shtator Planin e Masave për Sigurinë në Shkolla kisha parasysh këtë situatë alarmi social. Ministria e Brendshme, qeveria shqiptare është plotësisht e angazhuar për ta luftuar në çdo qelizë këtë rrjet.”
Ministri nënvizoi faktin se asnjë grup kriminal nuk do të lejohet të veprojë brenda perimetrit të sigurisë në shkollat e vendit dhe se format e dënimit për raste të tilla do të dyfishohen.
“Ministria e Brendshme synon të ngrejë në ditët në vijim një aleancë ndërinstitucionale dhe mbarëqytetare kundër përdorimit të drogës. Dua të garantoj sot më shumë se më parë, prindërit e gjyshërit që dërgojnë fëmijët në shkolla se Paketa jonë e Sigurisë po jep rezultatet e para dhe do të bëjmë të pamundurën që brenda këtij perimetri, grupet kriminale të mos afrohen. Do dyfishohen format e dënimit për shpërndarjen e shitjen e lëndëve narkotike brenda perimetrit të sigurisë së shkollave. E nxis Policinë e Shtetit ta ruajë këtë qasje të re në luftën kundër narkotikëve, është përgjegjësi e përbashkët e jona për ta çuar në nivel tjetër edhe qasjen e vetëpastrimit në radhët tona. Ky ishte operacioni i parë i këtij niveli dhe ju mos u habisni kur të kemi ngjarje të tilla në vijim.”
/a.r
