Si në një balet të sinkronizuar, pak minuta pasi 10 prokurorët ‘dezertorë’ të dosjes “Shullazi” publikuan një deklaratë në të cilën akuzonin kryeprokuroren se kishte shkelur ligjin, lidhur me hetimin e tyre disiplinor, ka ardhur edhe reagimi i PD- LSI, e cila ka shkuar më tej duke depozituar një padi penale në Prokurorinë e Tiranës, kundër Arta Markut. Padia përmban thuajse të njëjtët argumenta me të cilat 10 prokurorët akuzonin Markun për shkelkje të ligjit, vetëm se këto argumenta janë ngjyrosur dhe politikisht.
I gjithë ky ‘padurim” i PD- LSI për të ‘gozhduar’ edhe ata kryeprokuroren, qartazi duket se është një lëvizje jo e rastësishme, por mjaft e sinkronizuar, mes 10 prokurorëve dhe opozitës, në vijim të logjikës se ende nuk e gëlltisin dot largimin e ligjshëm të Adriatik Llallës si Prokuror i Përgjithshëm, periudhë gjatë së cilës PD- LSI kontrollonin haptazi politikisht institucionin e prokurorisë. Grupet parlamentare të Partisë Demokratike dhe Lëvizjes Socialiste për Integrim, në vjim të fushatës së tyre anti Marku kanë depozituar kallëzim penal ndaj Prokurores së Përgjithshme të Përkohshme. Opozita e akuzon atë për veprën penale të “Shpërdorimit të Detyrës”, parashikuar nga neni 248 i Kodit Penal.
PD dhe LSI i drejtohen Prokurorisë së Tiranës, duke theksuar se “lëvizjet kaotike dhe me urdhër politik të prokurorëve dhe drejtuesve të prokurorisë, pa asnjë plan të mirëfilltë organizimi dhe që kanë sjell dështimin e të gjitha çështjeve me ndjeshmëri të lartë publike, janë veprime të kundërligjshme, që prekin drejtpërdrejtë interesin e shtetit dhe të shtetasve”.
Opozita padit kryeprokuroren Arta Marku për largim të paligjshëm të prokurorëve që hetojnë ish- Ministrin e Brendshëm Saimir Tahiri, me qëllim mbylljen e hetimit ndaj tij. Ne emër të opozitës, kallëzimin e depozituan në prokurorinë e Tiranës, kryetarët e grupeve parlamentare PD- LSI, Spaho dhe Vasili.
Njoftimi i opozitës:
“Fillimisht, largoi nga Prokuroria e Krimeve të Rënda, duke komanduar si drejtuese e Prokurorisë së Tiranës, znj. Elisabeta Imeraj, Më pas, transferoi edhe prokurorin tjetër të çështjes, z. Besim Hajdarmataj nga Prokuroria e Krimeve të Rënda në Prokurorinë e Pogradecit. Lëvizja dhe transferimi i prokurorëve që udhëheqin çështjen penale të Saimir Tahirit, është një veprim aktiv dhe i kundërligjshëm, që bëhet me qëllimin e plotë të dështimit të hetimeve dhe përbën pa asnjë dyshim pengim të drejtësisë. Kjo lëvizje vjen në një kohë ku afati ligjor i hetimeve është drejtë përfundimit dhe prokurorët do të duhet të dalin me konkluzionin përfundimtar mbi këtë hetim”- thuhet në kallëzimin e depozituar në Prokurorinë e Tiranës.
Në Kallëzimin Penal theksohet gjithashtu, se akte të tilla të paligjshme nga Arta Marku, provojnë tërësisht se qëllimi i saj në detyrë është shërbimi politik ndaj Edi Ramës, dhe dështimi apo pengimi i hetimeve ndaj zyrtarëve të lartë të kësaj Qeverie apo organizatave kriminale të lidhura me të.
Duke qenë se Arta Marku drejton prokurorinë dhe kallëzimi është bërë tek vartësit e saj në Prokurorinë e Tiranës, opozita ka kërkuar njëkohësisht edhe marrjen e masës së përkohshme të prezullimit nga detyra deri në përfundimin e hetimit.
a.meta/javanews.al
