Ngjarja horror që ka tronditur provincën e Spineas në Venecia, ende nuk shpjegohet nga ana e ekspertëve kriminalistë të këtij qyteti, të cilët po hetojnë shkaqet e vrasjes së trefishtë.
Duke iu referuar të dhënave që janë dokumentuar deri më tani bëhet me dije se Vera, gruaja që u masakrua me thika nga ish-bashkëshorti kishte vite që ishte ndarë më Vironin.
Madje ata kanë jetuar edhe në të njëjtin lokalitet, ndonëse në largësi, ndërkohë që dy vajzat, i mbante dhe kujdesej për to Vera.
Banorët e lagjes së vogël e njihnin shqiptaren për shkak të peripecive të jetës së saj me rritjen e dy vajzave, e cila sipas dëshmive të tyre ishte detyruar të bënte dy-tre punë për të rritur fëmijët, pasi vajzën e vogël e kishte me probleme shëndetësore.
Madje, pasditen e djeshme, gazeta lokale, ka hapur një llogari dhe thirrje publike për t’iu ardhur në ndihmë dy vajzave dhe për të kontribuar në rritjen e tyre, duke tentuar kështu rritjen e sensibilizimit të opinionit jo vetëm të Spineas dhe Venecias por të gjithë Italisë.
Autoritetet hetimore veneciane kanë bërë me dije se gjatë hetimit është mësuar se në fakt, Vera bashkëjetonte me Floninon prej më shumë se tre vitesh.
Madje edhe autori i krimit, pra ish-bashkëshorti i saj ka qenë në dijeni të jetës së tyre të përbashkët dhe nuk ka shfaqur asnjë problem. Madje siç kanë dëshmuar edhe të afërmit e viktimës, djalit 24 vjeç nga Fieri, lidhja e tyre ka qenë e njohur edhe në të dy familjet respektive, ndërkohë që askush nuk di të thotë se për çfarë shkaku u sulmuan mbrëmjen e së dielës nga Karabollaj. Do të jenë telefonat e viktimave, si dhe dëshmia e vajzës së madhe të Verës që do të hedhë dritë sado pak mbi shkaqet e asaj ngjarjeje-masakër.
GAZETA LOKALE
Fqinjët kanë përshkruar mbrëmjen kur u vra 37-vjeçarja Vera Myrtaj (Mynevere Karabollaj) dhe i dashuri i saj 24 vjeç Flonino Mërkuri në banesën ku jetonin në Itali. Ata thonë se dëgjuan të bërtitura të mëdha dhe më pas panë makinat e policisë. “Britmat na thyen zemrat…”, rrëfyen ata.
Bruno, komshiu i moshuar i çiftit të vrarë nuk kursen fjalët për nënën e re.
“E njihja mirë. Ajo nuk ishte thjesht një person i mirë, ishte një grua e shkëlqyer. Punëtore dhe nënë fantastike. Ajo ishte gjithashtu shoqe e ngushtë me gruan time të ndjerë. Mynevere fitoi jetesën e saj si estetiste në shtëpi, duke bërë manikyr dhe pedikyr. Unë kisha një problem me një gozhdë dhe ajo më ndihmoi”, tha Bruno.
Të gjithë banorët në Spinea janë të tronditur nga ngjarja e rëndë. Vera dhe Flonino ishin njerëz që nuk dilnin shpesh, por të gjithë i njihnin dhe e dinin që ishin bashkë.
“Jemi të shokuar”, shpjegon një banor që jeton në fund të rrugës.
“I kam parë gjithmonë në rrugë, ajo ishte vërtet një person i mirë. Ish-burrin e saj e kam njohur, ai ka jetuar këtu deri para disa vitesh. Nuk e kisha imagjinuar kurrë një gjë të tillë. Nuk e di nëse ka lidhje edhe xhelozia, por si mund të arrish deri në këtë pikë?”, tha një zonjë që punonte pranë shtëpisë së tyre.
“Fillimisht pashë makinat e karabinierëve, më pas dëgjova të bërtiturat. Më dhembte zemra. Mendoj se ishin familjarët e viktimave, duhet të kenë bërtitur për gjysmë ore. Po dridhesha. Por ne nuk e kuptuam se çfarë kishte ndodhur, vetëm pasi u shfaq policia”, tha një tjetër banor.
Pas krimit të dyfishtë, ishbashkëshorti i saj, Viron Karabollaj, 40 vjeç, i cili është autori i ngjarjes, vrau veten dhe u gjet i vdekur në kasollen e kompanisë ku punonte.
Gjithçka ndodhi në banesën ku jetonte më parë Vironi, por pas ndarjes rreth 3 vite më parë, Vera qëndronte vetëm me dy vajzat e saj 15 dhe 13 vjeçe, derisa u njoh me 24-vjeçarin. Prej 1 viti e gjysmë, pjesë e familjes ishte bërë dhe i dashuri i saj Flonino, xhelozia për të cilin dyshohet se ka shtyrë ishburrin të kryejë krimin.
/s.f
