Babai i Artur Kaçanollit, i cili pak ditë më parë u dënua me burgim të përjetshëm për vrasjen e dy kunatave të moshuara, Elsa dhe Gjinovefa Vava, përkatësisht 72 dhe 77 vjeç, thotë se i biri i tij është i pafajashëm dhe i dënuar pa asnjë provë. Ngjarja ndodhi në orët e para të mëngjesit të 2 shtatorit të vitit 2014 në qytetin e Durrësit. Edhe pse krimi u mor përsipër nga Indrit Shaqja, togat e zeza shpallën fajtor dhe nipin e dy viktimave, Kaçanollin. Pas vendimit ka reaguar Fahri Kaçanolli nga Shijaku. Në një intervistë dhënë për Gazetën Shqiptare, 66-vjeçari pohoi se djali i tij është i pafajshëm dhe se nuk mundet të jetojë, nëse nuk e nxjerr atë nga burgu e të vendosë drejtësi.
“Djali im nuk është i përfshirë në vrasjen e dy kunatave Vava. Në kohën kur ndodhi ngjarja, ai ishte në shtëpinë e tij, në krevatin e tij duke fjetur. Gjykata e Durrësit e dënoi me burgim të përjetshëm pa pasur asnjë provë. Vendimi është skandaloz, as në kohën e Enverit nuk dënoheshin njerëzit pa pasur faj. Unë shes dhe organet e trupit që të nxjerr tim bir nga burgu. Çështjen do e çoj në Gjykatën e Lartë dhe po të jetë nevoja dhe në Strasburg”, thotë Fahri Kaçanolli.
BW
