Babai denoncon ish-gruan: Më ka marrë vajzën, ikur në Siri
Një baba 37-vjeçar nga Korça ka denoncuar largimin e ishbashkëshortes së tij drejt Turqisë së bashku me vajzën e mitur pasi i trembet trafikimit të saj.
Sipas të dhënave 26-vjecarja Albana Mane banuese në Korçë së bashku me vajzën e saj 5-vjeçare janë nisur më se një muaj më parë drejt Turqisë, por nuk janë kthyer më.
Sipas Elio Mane e reja shpesh shkonte në jashtë shtetit për të punuar për disa javë dhe këtë herë duhet të ishte kthyer në fillim të shtatorit, por kjo gjë nuk ka ndodhur. Fakti që ajo ka marre edhe vajzën e mitur me vete ka alarmuar 37 vjecarin i cili ka kërkuar ndihmën e policisë ndërsa i trembet largimit të saj të mundshëm drejt Sirisë së bashku me vajzën.
“Ne jemi ndarë 4 vjet më parë dhe prej atij momenti unë jam kujdesur për vajzën së bashku me nënën time. Në gusht, ishbashkëshortja më kërkoi që t’i autorizoja marrjen e vajzës në Turqi pasi do të shkonte për pak kohë atje për të punuar. Nuk doja ta pengoja pasi ishte një mundësi e mirë që vajza të kalonte pak kohë me nënën e saj ndaj dhe i dhashë një prokurë ku sikundër kishim rënë dakord ajo duhet të ma kthente vajzën në datën 10 shtator. Me kishte lënë edhe një numër kontakti për të folur gjatë kësaj kohe. Pasi kaluan ditët unë i telefonova dhe i kërkova të më kthejë vajzën pasi duhet të shkonte në kopsht por ajo më kërcënoi madje më tha se nuk do ma kthente më. Trembem se mos vajzën ma trafikojnë, trembem se mos ma çojnë në Siri ose në ndonjë vend tjetër islamik dhe ajo është e pafuqishme për t’u mbrojtur. I lutem shtetit dhe organizatave të më ndihmojnë. E kam rritur me sakrifica mes skamjes dhe papunësisë ndaj nuk dua ti ndodhë asgjë e keqe”, është shprehur Elio Mane.
Policia e Korçës kanë njoftuar se ndaj 26-vjeçares ka nisur procedimi penal në gjendje të lirë. Sipas njoftimit zyrtar Procedimi ndaj saj filloi, pas kallëzimit të bërë, nga ish/bashkëshorti i saj, i cili pretendon se, ishbashkëshortja e tij, është larguar në Turqi më datë 16.08.2015, së bashku me vajzën e tyre S.M, vjeç 5, banuese në Korçë, dhe prej asaj kohe, nuk janë kthyer më në banesë.
