Shqiptarët vijojnë të qëndrojnë në krye të listës së azilkërkuesve në të paktën 5 vende të Bashkimit Evropian, duke qenë i vetmi vend evropian që rezulton në listat e Eurostat.
Zyra europiane e statistikave, EUROSTAT, ka publikuar listën, ku shqiptarët evidentohen si kërkues azili në Francë, Holandë, Irlandë, Luksembourg dhe Islandë.
Në Francë, rritja e kësaj shifre është më e fortë krahasuar me gjithë shtetet e tjera, pasi në vetëm 3 muaj, rreth 1200 shtetas shqiptarë kanë kërkuar azil. Franca pasohet nga Mbretëria e Vendeve të Ulëta, ku 385 shtetas shqiptarë kanë kërkuar azil. Në Holandë, shqiptarët kanë qenë grupi më i madh që kërkon azil, duke kaluar dhe azilkërkuesit nga Siria, shkruan ABC News.
Eurostat ka publikuar dhe totalin e azilkërkuesve në Europë, ku vihet në dukje që 2% të totalit të azilkërkuesve në Europë janë me kombësi shqiptare. Kështu, Shqipëria është i vetmi shtet Europian që është në këtë listë të EUROSTAT-it.
Deri tani nga të gjithë shtetet ku shqiptarët janë në krye të listës së azilkërkuesve, vetëm Holanda ka nisur sinjale të forta ndaj Tiranës zyrtare për të frenuar kërkesat./a.m.
