Kryetari i Komitetit të Ndërmjetësimit për Bashkëjetesë Kombëtare, në këmbim të një shume parash jepte vërtetim fakti, me qëllim për të kërkuar azil në vendet e BE-së.
Specialistët e Seksionit kundër Krimit Ekonomik dhe Financiar në Policinë e Durrësit, pas një hetimi 1-mujor, me metoda speciale kanë finalizuar me sukses operacionin e koduar “Azilkërkuesi”, ku kanë bërë të mundur arrestimin në flagrancë të dy shtetasve, konkretisht:
• Ndrec Prenga 64 vjeç, banues në Durrës, Kryetar i Komitetit të Ndërmjetësimit për Bashkëjetesë Kombëtare;
• Sabahet Manuka 65 vjeçe, banuese në Tiranë.
Arrestimi i tyre u bë pasi në afërsi të Ish-Doganës, Tiranë, Manuka, u kap në flagrancë, duke i dhënë 300 € Ndrecës, në këmbim të një vërtetimi fakti që i ka dhënë ky i fundit, me qellim për ta përdorur për të kërkuar azil në vendet e BE-së.
Në cilësinë e provës materiale u sekuestruan 300€; 1 vulë dhe 3 telefona celularë.
Ndrec Prenga është person me preçedentë penalë të mëparshëm, i dënuar për të njëjtën vepër penale.
Materialet i kaluan Prokurorisë së Rrethit Gjyqësor Durrës për veprime të mëtejshme për veprat penale :
• “Korrupsioni pasiv në sektorin privat “dhe”Falsifikimi i dokumenteve”, në ngarkim të shtetasit Ndrec Prenga, parashikuar në nenet 164/b dhe 186/3 të Kodit Penal.
• “Korrupsioni aktiv në sektorin privat”në ngarkim të shtetases Sabahet Manuka, parashikuar në nenin 164/a të Kodit Penal.
