Anëtari i Kryesisë së Partisë Demokratike, Azgan Haklaj ka deklaruar në studion e RTSH24 se mazhoranca kërkon të nxjerrë nga arresti shtëpiak ish-kryeministrin Sali Berisha pasi sipas tij, e do në Parlament për të sulmuar opozitën.
Sipas Haklajt, ngritja e komisionit për diskutimin e nxjerrjes së të dhënave të sistemit TIMS, kishte si synim përveç të tjerash edhe nxjerrjen e Berishës nga arresti për ta thirrur si dëshmitar në Kuvend.
“Dhe komisioni TIMS që kishte si synim nxjerrjen e Berishës nga arresti dhe dërgimin e tij në Parlament për ta pyetur atë si dëshmitar dhe për ta quajtur si pjesëmarrje në Parlament.
Është besëlidhje e trekëndëshit të Bermudës, Rama, Berisha dhe Meta. Partisë Socialiste i intereson kjo… e patë sot në Parlament u nisën kundër Ramës dhe përfunduan tek Berisha”, u shpreh Haklaj në RTSH24.
Ai vuri në dukje gjithashtu se Berisha dhe Meta po mbajnë në pushtet Edi Ramën si pjesë e marrëveshjes së Trekëndëshit të Bermudës të etikuar më parë nga kryedemokrati Lulzim Basha.
“Kjo është një lojë e mirë-organizuar për të zgjatur sa më shumë betejën sepse tani po afrohemi edhe vendimit të Gjykatës për vulën. E do Berishën në Parlament për të thënë se; ja fytyra e opozitës. Rama thotë se nëse iki unë vjen Berisha. Berisha dhe Meta po mbajnë në pushtet Ramën”, tha Haklaj.
Anëtari i kryesisë së PD-së foli gjithashtu edhe për komisionin e Posaçëm Antikorrupsion ku sipas tij, qëllimi i këtij komisioni është goditja e Gjykatës Kundër Korrupsionit dhe Krimit të Organizuar.
“Amnistia penale kishte si synim të godiste SPAK-un si investim të Shteteve të Bashkuara të Amerikës. Filloi loja pastaj me Komisionin e Posaçëm me Fatmir Xhafajn.
Fatmir Xhafaj në fillim u përpoq ta sillte si zëvendëskryeministër dhe ministër të Drejtësisë për t’u thënë amerikanëve se iu solla atë që ka bërë reformën në drejtësi. Nuk ia arriti qëllimit të tij dhe tani ka bërë komisionin e Posaçëm. Kryetari i Komisionit të Posaçëm që ka anëtarë të komisioneve të përhershme. Pra një senat që përdoret për interesat e mazhorancës për të goditur reformën në drejtësi.
Ky është qëllimi për të goditur GJKKO-n, jo SPAK-un. Shpërdorimin e detyrës duan ta kalojnë te gjykatat e tjera dhe jo te GJKKO. Qëllimi i tyre është për të goditur GJKKO-në dhe për ta bërë pjesë të juridiksionit të përgjithshëm”, nënvizoi Haklaj.
/a.r
